...अन नागपूरकरांनी व्यक्त केली हळहळ

ज्येष्ठ संगीतकार आनंद मोडक यांच्या कार्यक्रमाच्या आठवणी अजून ताज्या आहेत. कार्यक्रम संपला असला तरी त्यांचे स्वर आणि स्वरसाज रसिक विसरले नाहीत. विसरू शकत नाहीत. संगीतातून आनंद शोधणारा

संगीतकार आनंद मोडक यांचे आवडते शहर नागपूर

नागपूर : ज्येष्ठ संगीतकार आनंद मोडक यांच्या कार्यक्रमाच्या आठवणी अजून ताज्या आहेत. कार्यक्रम संपला असला तरी त्यांचे स्वर आणि स्वरसाज रसिक विसरले नाहीत. विसरू शकत नाहीत. संगीतातून आनंद शोधणारा आणि रसिकांना आनंद देणार्‍या आनंद मोडक यांचे पुणे येथे आज निधन झाले. ७ मे २०१२ साली त्यांचा एकमेव कार्यक्रम नागपुरातील सायंटिफिक सभागृहात आयोजित करण्यात आला. हा कार्यक्रम सप्तकने आयोजित केला होता. त्यावेळी त्यांच्या गीतसंगीतावर प्रेम करणार्‍या चाहत्यांनी प्रत्यक्ष अनुभवण्यासाठी गर्दी केली. त्यांच्या निधनाची बातमी कळताच नागपूरकर रसिक हळहळले. त्यांच्या निधनाने संगीत क्षेत्रावर स्वत:चे नाव स्वत:च्या स्वतंत्र शैलीने अंकित करणारा एक महान संगीतकार गमाविल्याची खंत नागपूरकरांनी व्यक्त केली. आनंद मोडक यांनी अनवट सुरावटींना हात घातला. ते मूळ विदर्भाचे म्हणजे अकोल्याचे होते. त्यामुळेच विदर्भातील रसिकांनी त्यांच्यावर भरभरून प्रेम केले. अकोल्यात त्यांचे पदवीपर्यंतचे शिक्षण झाले. त्यानंतर नागपुरातल्या कार्यक्रमासाठी ते उत्सुक असायचे. त्यांना हे शहर आणि येथील रसिक, त्यांचे संगीतवारचे प्रेम माहीत होते. अनवट आणि भावपूर्णता हा त्यांच्या संगीताचा गाभा होता. अकोल्यावरून पुण्यात गेल्यावर त्यांच्या घराशेजारी राहणार्‍या अभिनेते मोहन गोखले यांनी त्यांना थिएटरमध्ये आणले आणि त्यांच्या आयुष्याची दिशा बदलली. त्यानंतर घाशीराम कोतवाल या नाटकाला संगीत देताना त्यांनी यात भूमिकाही केली. चौकट राजा, एक होता विदूषक, हरिश्चंद्राची फॅक्टरी, समांतर, नातीगोती, तू तिथे मी आदी चित्रपटांना त्यांनी दिलेले संगीत लोकप्रिय झाले. त्यांचा कार्यक्रम चांगलाच रंगला. अजेय गंपावार यांनी त्यांची मुलाखत घेतली होती. (प्रतिनिधी)