वैद्यकीय व्यावसायिकाला त्रास : जरीपटका पोलिसांची कारवाई

स्वत:ला पत्रकार म्हणवून घेत एका वैद्यकीय व्यावसायिकाला खंडणी मागणाऱ्या टोळीतील दोन भामट्यांच्या जरीपटका पोलिसांनी मुसक्या बांधल्या

नागपूर : स्वत:ला पत्रकार म्हणवून घेत एका वैद्यकीय व्यावसायिकाला खंडणी मागणार्‍या टोळीतील दोन भामट्यांच्या जरीपटका पोलिसांनी मुसक्या बांधल्या. अजय श्यामराव बारापात्रे (वय ३१) आणि फिरोज खान शमीउल्ला पठाण (वय ३३), अशी या भामट्यांची नावे आहेत. हे दोघेही यशोधरानगर पोलीस ठाण्याच्या हद्दीतील नागसेननगरात राहतात. डॉ. महिपाल व्यंकटराव सोनपिंपळे (वय ४५) हे आयुर्वेदिक डॉक्टर आहेत. जरीपटक्यातील बाबा दीपसिंगनगरात (उप्पलवाडी) त्यांचा छोटासा दवाखाना आहे. ३ मेच्या दुपारी २ वाजता आरोपी अजय, फिरोज आणि त्यांचे साथीदार एका रुग्णाला घेऊन आले. या रुग्णाला अशक्तपणा आहे, त्यामुळे त्याला सलाईन लावून द्या, अशी मागणी त्यांनी केली. आपण आयुर्वेद चिकित्सक आहोत, त्यामुळे आपल्याला सलाईन लावता येणार नाही, असे सोनपिंपळे यांनी सांगितले. मात्र, आरोपींनी सलाईन लावण्याचा हेकाच धरला. अखेर सोनपिंपळे यांनी आरोपीच्या साथीदाराला सलाईन लावले. त्याची आरोपींनी मोबाईलच्या कॅमेर्‍यातून शूटिंग केली. त्यानंतर आरोपींनी सोनपिंपळेंना आपले असली रूप दाखवले. तुम्ही अँलोपॅथी डॉक्टर नसताना पेशंटला सलाईन कशी लावू शकता. उपचाराच्या नावाखाली तुम्ही रुग्णांची फसवणूक करता, त्यांच्याकडून मोठी रक्कम उकळता, असे म्हणत त्यांनी तुमचा भंडाफोड करतो, असा दम दिला. आम्ही पत्रकार आहोत, तुमची शूटिंग विविध चॅनलवर दाखवतो, अशी धमकीही दिली. तुमची बदनामी होईल आणि तुमच्यावर पोलीस केसही होईल, हे टाळायचे असेल तर तुम्हाला दोन लाख रुपये द्यावे लागतील, असे आरोपींनी सोनपिंपळेंना म्हटले. खंडणीची रक्कम आताच पाहिजे, असेही ते म्हणाले. या एकूणच प्रकारामुळे हादरलेल्या सोनपिंपळे यांनी बाजूलाच राहणार्‍या आपल्या कुटुंबीयांना बोलवून घेतले. कुटुंबीयांनी आरोपींचे हातपाय जोडून प्रकरण निस्तरण्याची विनंती केली. मात्र, आताच्या आता दोन लाख रुपये द्या अन्यथा तुमची खैर नाही, असा दम आरोपींनी दिला. त्यामुळे सोनपिंपळे कुटुंबीयांनी आरोपींना लगेच २0 हजार रुपये दिले. दुसर्‍या दिवशी (४ मे) १ लाख ८0 हजार देण्याचे ठरले. त्यामुळे आरोपी निघून गेले. संबंधित प्रकाराची तक्रार सोनपिंपळे यांनी जरीपटका ठाण्यात नोंदवली. त्यावरून पोलिसांनी सापळा रचला. खंडणीचे १ लाख ८0 हजार घेण्यासाठी मंगळवारी रात्री ८.३0 वाजता आरोपींना बोलविण्यात आले. आरोपी अजय आणि फिरोज हे दोघे सोनपिंपळे यांच्याकडे पोहोचले. त्यांचे साथीदार दूर अंधारात दडून होते. खंडणीची रक्कम स्वीकारताच पोलिसांनी अजय आणि फिरोजच्या मुसक्या बांधल्या. ते दिसताच त्यांचे साथीदार पळून गेले. (प्रतिनिधी)