नागपूर: अज्ञात वाहनाने धडक दिल्यामुळे ट्रॅव्हल्समध्ये कार्यरत कर्मचारी ठार झाल्याची घटना सक्करदरा पोलिस ठाण्यांतर्गत रविवारी १८ फेब्रुवारीला रात्री ८.४५ वाजताच्या सुमारास सक्करदरा उड्डाणपुलावर घडली. सचिन भाष्कर मिरे (३४, रा. गल्ली नं. २, आशिर्वादनगर) असे या अपघातातमृत्यू झालेल्या व्यक्तीचे नाव आहे.
पोलिसांनी दिलेल्या माहितीनुसार सचिनच्या कुटुंबात पत्नी, आईवडिल आणि भाऊ आहे. ते पत्नीसोबत वेगळे राहत होते. ते साई ट्रॅव्हल्समध्ये कर्मचारी होते. रविवारी रात्री ते आपली दुचाकी क्रमांक एम. एच. ४९, एस-५१२ ने गणेशपेठ येथे जात होते. सक्करदरा उड्डाणपुलावर मध्यभागी अज्ञात वाहनचालकाने आपल्या ताब्यातील वाहन भरधाव वेगाने व निष्काळजीपणे चालवून त्यांच्या दुचाकीला धडक दिली. यात ते गंभीर जखमी झाले. अपघातानंतर आरोपी वाहनचालक पळून गेला.
सचिन यांना उपचारासाठी मेडिकलमध्ये नेले असता डॉक्टरांनी तपासून मृत घोषित केले. या प्रकरणी सोनल सचिन मिरे (३३) यांनी दिलेल्या तक्रारीवरून सक्करदरा ठाण्याचे उपनिरीक्षक सागर अरबट यांनी अज्ञात आरोपी वाहनचालकाविरुद्ध कलम २७९, ३३८, ३०४ (अ), सहकलम १३४, १७७, १८४ नुसार गुन्हा दाखल करून आरोपी वाहनचालकाचा शोध सुरु केला आहे.