नागपूर : देशी गावठी पिस्तुलासह पोलिसांनी तीन आरोपींना अटक केली आहे. तर पिस्तुल पुरविणारा आरोपी अद्यापही फरार आहे. यशोधरानगर पोलीस ठाण्याच्या हद्दीत ही गुन्हे शाखेच्या युनिट क्रमांक तीनच्या पथकाने ही कारवाई केली.
यशोधरानगर पोलीस ठाण्याच्या हद्दीत राहणाऱ्या मोहम्मद ईरफान मोहम्मद जाहीद (२६, आजरी माजरी, काच कंपनीजवळ) याच्याकडे देशी पिस्तुल असल्याची माहिती खबऱ्यांच्या माध्यमातून गुन्हे शाखेच्या पथकाला मिळाली. पोलिसांनी त्याच्या घरी जाऊन झडती घेतली असता त्याच्याकडे ५० हजारांचे पिस्तुल व एक राऊंड सापडले. पोलिसांनी हे पिस्तुल कुठून आले याबाबत विचारणा केली असता त्याने उडवाउडवीची उत्तरे दिली. पोलिसी खाक्या दाखविल्यावर त्याने आसीफ अख्तर उर्फ सिराजुद्दीन अन्सारी (३२, नवीन वस्ती, टेकानाका) व मोहम्मद आरीफ मोहम्मद मिझाज (२७, आजरी माजरी) यांच्याकडून पिस्तुल घेतल्याचे सांगितले.
पोलिसांनी त्या दोघांनादेखील अटक केली. चौकशीदरम्यान त्यांनी नासीर उर्फ बब्बा (शितला माता चौकजवळील झोपडपट्टी, यशोधरानगर) याच्याकडून पिस्तुल घेतल्याची कबुली दिली. तिन्ही आरोपींविरोधात गुन्हा दाखल करत अटक करण्यात आली तर नासीरचा शोध सुरू आहे. वरिष्ठ पोलीस निरीक्षक महेश सागडे, सचिन भोंडे, ईश्वर खोरडे, मुकेश राऊत, अनिल जैन, प्रविण लांडे, अनुप तायवाडे, अमोल जासूदर, शेख फिरोज, संतोष चौधरी यांच्या पथकाने ही कारवाई केली.