नागपूर : २० दिवसांपूर्वीच लग्नाच्या बंधनात अडकलेल्या नवविवाहितेने गळफास घेऊन आत्महत्या केल्याची दुखद घटना नंदनवन पोलिस ठाण्याच्या हद्दीत शुक्रवारी १ मार्चला रात्री ११ वाजता ते शनिवारी २ मार्चच्या सकाळी ८ वाजताच्या दरम्यान घडली आहे. अस्मिता निखीलकुमार भुतागे (२४, रा. प्लॉट नं. २७, श्रीनगर, नंदनवन) असे गळफास घेऊन आत्महत्या केलेल्या नवविवाहितेचे नाव आहे.
पोलिसांनी दिलेल्या माहितीनुसार अस्मिता यांचे ११ फेब्रुवारी २०२४ रोजी लग्न झाले होते. त्यांच्या कुटुंबात पती, सासरे आहेत. रमाईनगर टेकानाका येथील रहिवासी असलेल्या अस्मिताच्या आईने पोलिसांना दिलेल्या माहितीनुसार अस्मिताचे लग्नही तिच्या पसंतीने करण्यात आले होते. सर्व काही सुरळीत सुरु असताना अस्मिताने आपल्या राहत्या घरी बेडरुममधील सिलींग फॅनला ओढणी बांधुन गळफास घेतला. त्या गळफास घेतलेल्या अवस्थेत दिसल्यामुळे नातेवाईकांनी त्यांना खाली उतरवून उपचारासाठी मेडिकलमध्ये नेले.
तेथे डॉक्टरांनी त्यांना तपासून मृत घोषित केले. या प्रकरणी निखीलकुमार महेश भुतागे (३२) यांनी दिलेल्या सुचनेवरून नंदनवन ठाण्याचे उपनिरीक्षक दिलीप आडे यांनी अकस्मात मृत्युची नोंद करून तपास सुरु केला आहे. २० दिवसांपूर्वीच लग्न बंधनात अडकलेल्या अस्मिता यांनी गळफास घेऊन आत्महत्या केल्यामुळे सर्वत्र हळहळ व्यक्त करण्यात येत आहे.