योगेश पांडे, नागपूर : संशयावरून पकडलेल्या एका आरोपीच्या खिशातूनच चक्क पिस्तुल निघाल्याने पोलीस यंत्रणेत खळबळ उडाली आहे. तहसील पोलीस ठाण्याच्या हद्दीत हा प्रकार घडला.
सोमवारी मध्यरात्रीनंतर पोलिसांचे पथक पेट्रोलिंग करत असताना मस्कासाथ मार्गावरील बंगालीपंजा येथील मेमन जमात हॉलच्या गल्लीत दोन व्यक्ती संशयास्पदरित्या बसलेले दिसले. पोलीस तेथे पोहोचले असता एक आरोपी फरार झाला तर दुसरा आरोपी ताब्यात आला. पोलिसांनी त्याची झडती घेतली असता त्याच्याजवळून पिस्तुल, दोन जिवंत काडतुसं आढळली. गणेश विश्वनाथ तलवारे (३०, चांद मोहल्ला, बंगालीपंजा) असे आरोपीचे नाव आहे.
पोलिसांनी त्याच्याकडून एकूण १.२९ लाखांचा मुद्देमाल जप्त केला. त्याचा सहकारी फहीम उर्फ गुड्डू शेख (बंगालीपंजा) हा फरार आहे. पोलिसांनी दोन्ही आरोपींविरोधात गुन्हा दाखल केला आहे. मागील आठवड्यात याच पद्धतीने एका आरोपीकडेदेखील पिस्तुल सापडले होते. तो आरोपी साथीदारांसोबत व्यापाऱ्यांना लुटण्यासाठी बाहेरील राज्यातून नागपुरात आला होता. खुलेआमपणे पिस्तुल घेऊन गुन्हे करण्यासाठी फिरणाऱ्या आरोपींमुळे पोलीस यंत्रणेवर प्रश्नचिन्ह उपस्थित होत आहे.