योगेश पांडे
नागपूर : तुकडोजी पुतळ्याजवळ एका भरधाव ट्रकचालकाने दिलेल्या धडकेत दुचाकीवर जाणाऱ्या विद्यार्थिनीचा मृत्यू झाला. दुर्दैवाची बाब म्हणजे तिच्या जन्मदात्या आईसमोरच तिचा मृत्यू झाला. अजनी पोलीस ठाण्याच्या हद्दीत ही घटना घडली.
अश्लेषा सुनिल ठेंबरे (२०, चंद्रमणी नगर, अजनी) असे मृतक मुलीचे नाव आहे. अश्लेषा ही आपल्या दुचाकीवरून आई वर्षा (४७) हिला घेऊन जात होती. त्यावेळी एमएच ३६ एफ ०२५३ हा दहा चाकी ट्रक वेगात आला. ट्रकचालकाचे नियंत्रण राहिले नाही व त्याने दुचाकीला धडक दिली. यात अश्लेषा व तिची आई दोघेही खाली फेकल्या गेल्या. अश्लेषाच्या डोक्यावर मार बसल्याने ती जागेवरच बेशुद्ध पडली तर वर्षा यांच्या पायावरून ट्रकचे चाक गेले. या अपघातामुळे घटनास्थळी तणाव निर्माण झाला व आरोपी ट्रकचालक ट्रक सोडून पळून गेला. लोकांनी व पोलिसांनी दोघांना मेडिकलमध्ये नेले. मात्र अश्लेषाचा मृत्यू झाला होता.
तिच्या आईवर उपचार सुरू आहेत. तिचे वडील हिंगणा मार्गावरील एका वाहतूक कंपनीत काम करतात. अश्लेषा ही त्यांची एकुलती एक मुलगी होती व मुलगी शिकून मोठी होईल अशी स्वप्ने ठेंबरे दांपत्य पाहत असताना क्षणात होत्याचे नव्हते झाले. पोलिसांनी तिच्या वडीलांच्या तक्रारीवरून ट्रकचालकाविरोधात गुन्हा दाखल केला असून त्याचा शोध सुरू आहे.