नागपूर: भरधाव बोलेरो वाहनाने धडक दिल्यामुळे शाळेत जात असलेली शिक्षिका गंभीर जखमी झाली. ही घटना पारडी पोलिस ठाण्याच्या हद्दीत शनिवारी सकाळी ७.१५ वाजताच्या सुमारास घडली. स्वाती हरिओम तेलरांधे (३५, रा. न्यु बिडीपेठ, सक्करदरा) असे गंभीर जखमी झालेल्या शिक्षिकेचे नाव आहे. त्या पारडी पोलिस ठाण्याच्या हद्दीतील जगजीवनराम स्कुलमध्ये शिक्षिका आहेत. त्या आपली मोपेड गाडी क्रमांक एम. एच. ४९, टी. सी-०१४७ ने शाळेत जात होत्या.
तेवढ्यात प्रजापती मेट्रो स्टेशन रोडवर एच. बी. टाऊन चौक येथे महिंद्रा बोलेरो क्रमांक एम. एच. ३२, क्यु-४५२९ च्या चालकाने आपल्या ताब्यातील वाहन भरधाव वेगाने व निष्काळजीपणे चालवून स्वाती यांच्या मोपेडला मागुन जोरात धडक दिली. यात त्या गंभीर जखमी झाल्या. अपघातानंतर बोलेरोचा आरोपी चालक घटनास्थळावरून पळून गेला. जखमी झालेल्या स्वाती यांना खासगी रुग्णालयात दाखल करण्यात आले. त्यांनी दिलेल्या तक्रारीवरून पारडी पोलिसांनी आरोपी बोलेरो चालकाविरुद्ध कलम २७९, ३३७, ३३८, सहकलम १८४, १३४, १७७ नुसार गुन्हा दाखल करून आरोपीचा शोध सुरु केला आहे.