सुनील देशपांडे यांचे कार्य समर्पण वृत्तीचे

- ग्रामायणतर्फे श्रद्धांजली

नागपूर : विद्यार्थी परिषदेपासून सुरुवात करणारे संपूर्ण बांबू प्रकल्पाचे प्रमुख सुनील देशपांडे यांचे कार्य पूर्णत: समर्पण वृत्तीचे होते, अशी भावना सामाजिक क्षेत्रातील विविध मान्यवरांनी त्यांच्या अकाली निधनाविषयी व्यक्त केली.

ग्रामायण प्रतिष्ठानच्या वतीने सुनील देशपांडे यांना ऑनलाइन श्रद्धांजली वाहण्यात आली. यावेळी राष्ट्रीय स्वयंसेवक संघाचे अखिल भारतीय प्रचार प्रमुख सुनील आंबेकर यांनी शाेकसंवेदना व्यक्त करताना जुन्या आठवणींना उजाळा दिला. ओलावा संस्थेच्या मीरा कडबे यांनी त्यांच्या कार्याचा आढावा घेतला तर भारतीय स्त्रीशक्तीच्या अखिल भारतीय संघटनमंत्री डॉ. मनीषा कोठेकर यांनी सुनील देशपांडे यांच्या वक्तृत्त्वाची वैशिष्ट्ये विशद केली. अखिल भारतीय विद्यार्थी परिषदेचे जनजाती क्षेत्राचे राष्ट्रीय प्रमुख प्रफुल्ल आकांत यांनी त्यांच्यासोबत आलेल्या कार्याचा अनुभव सादर केला. याप्रसंगी मगन संग्रहालयाच्या प्रमुख विभा गुप्ता, ॲड. मदन सेनाड, संपूर्ण बांबू केंद्राच्या कार्यकारिणी सदस्या अरुणा गजभिये, ग्रामायणचे अध्यक्ष अनिल सांबरे, ज्येष्ठ समाजसेवक डॉ. रवींद्र कोल्हे व स्मिता कोल्हे, महान संस्थेचे संस्थापक डॉ. आशिष सातव, राष्ट्रीय कारागीर पंचायतचे महेश शर्मा सहभागी झाले होते.

.................