गळफास घेऊन आत्महत्या

नागपूर : यशोधरानगरच्या विनोबा भावेनगरात बुधवारी सकाळी एका ४० वर्षीय व्यक्तीने गळफास घेऊन आत्महत्या केली. दिवाकर प्रेमलाल कानमोडे असे मृताचे नाव आहे. दिवाकर सकाळी ७.४५ वाजता घरातील बाथरुममध्ये हँगरला बांधलेल्या शर्टने गळफास घेतल्याचे दिसले. दिनेश कानमोडे यांच्या सूचनेवरून यशोधरानगर पोलिसांनी अकस्मात मृत्यूची नोंद करून तपास सुरू केला आहे.

.........

यशोधरानगरातून अल्पवयीन मुलगी बेपत्ता

नागपूर : यशोधरानगर परिसरातून एक १७ वर्षीय अल्पवयीन मुलगी बेपत्ता झाली आहे. मंगळवारी २३ फेब्रुवारीला दुपारी ३ वाजता ही अल्पवयीन मुलगी घरातून निघून गेली. कुटुंबीयांनी सर्वत्र तिचा शोध घेतला, परंतु तिचा पत्ता लागला नाही. कुटुंबीयांनी दिलेल्या तक्रारीवरून पोलिसांनी सर्वोच्च न्यायालयाच्या निर्देशानुसार अपहरणाचा गुन्हा दाखल करून तपास सुरू केला आहे.

.............

दुचाकी चोरट्यांना अटक

नागपूर : पाचपावली पोलिसांनी बुधवारी दुचाकी चोरी करणाऱ्या दोन कुख्यात आरोपींना प्रोडक्शन वॉरंटवर अटक केली आहे. शुभम ऊर्फ शुटर श्यामराव नेवारे (२५) रा. भांडेप्लॉट, सेवादलनगर आणि स्वप्निल ऊर्फ मोनू भीमराव नाईक (३२), अशी आरोपींची नावे आहेत. तहसील पोलिसांनी आरोपींना २२ फेब्रुवारीला अटक केली होती. आरोपींनी पाचपावली आणि जरीपटका ठाण्यांतर्गत दुचाकी चोरी केल्याची कबुली दिली होती. त्यानुसार पाचपावली पोलिसांनी दोघांचा प्रोडक्शन वॉरंट मिळवून त्यांना तुरुंगातून ताब्यात घेतले. आरोपींकडून एक लाख रुपये किमतीची दोन वाहने जप्त करण्यात आली आहेत.

................

कारच्या धडकेमुळे बाईकस्वाराचा मृत्यू

हिंगणामधील जामठा येथे अपघात

नागपूर : हिंगणा ठाण्यांतर्गत जामठा येथे एका भरधाव कारची धडक लागल्यामुळे बाईकवर असलेल्या युवकाचा मृत्यू झाला. वाहन चालक भान्या तुकाराम गावंडे (४०) जखमी आहे. सुनील गावंडे (२०) रा. सक्करदरा असे मृत झालेल्या बाईकस्वाराचे नाव आहे. ही घटना बुधवारी दुपारी २.३० वाजता घडली. फिर्यादी भान्या आपल्या बाईक क्रमांक एमएच ४९, बीएन-८८९५ वर सुनीलला बसवून जामठ्याला जात होते. जामठा येथील डिव्हायडरजवळ कार क्रमांक एमएच ४९, यू-२९५१ च्या आरोपी चालकाने बेजबाबदारपणे कार चालवून त्यांच्या बाईकला धडक दिली. यात भान्या जखमी झाले तर सुनीलचा मृत्यू झाला. संग्राम फिमारे यांच्या तक्रारीवरून हिंगणा पोलिसांनी कार चालकाविरुद्ध गुन्हा दाखल केला आहे.

...........