नागपूर : ‘नीट’ची तयारी करणाऱ्या अकरावीतील एका विद्यार्थ्याने नागपुरात गळफास घेत आत्महत्या केली. तो मुळचा मध्यप्रदेशमधील होता व शिक्षणासाठी नागपुरात आला होता. आपला मुलगा डॉक्टर होईल असे त्याच्या पालकांचे स्वप्न होते. मात्र आता त्या स्वप्नांचा चुराडा झाला आहे. अंबाझरी पोलीस ठाण्याच्या हद्दीत ही घटना घडली.
अथर्व सत्येंद्र श्रीवास्तव (१७, ए टू झेड व्हेंचर पी.जी.हॉस्टेल, गोकुळपेठ) असे मृतक विद्यार्थ्याचे नाव आहे. तो मुळचा मध्यप्रदेशमधील छिंदवाड्यातील प्रियदर्शिनी कॉलनी येथील रहिवासी होता. ‘नीट’च्या तयारीसाठी त्याने नागपुरात कोचिंग क्लासेस लावले होते व तो हॉस्टेलमध्ये रहायचा. गुरुवारी १२ वाजताच्या अगोदर त्याने त्याच्या खोलीत सिलींग फॅनला गळफास घेत आत्महत्या केली. बराच वेळ झाला तरी त्याने दरवाजा न उघडल्याने त्याच्या हॉस्टेलमधील इतर विद्यार्थ्यांनी आवाज दिला. आतून प्रतिसाद न आल्याने वॉर्डनला माहिती देण्यात आली. खोली उघडल्यावर तो गळफास घेतलेल्या अवस्थेत मिळाला. त्याला मेडिकल इस्पितळात नेले असता डॉक्टरांनी मृत घोषित केले.
त्याने नेमक्या कुठल्या कारणामुळे आत्महत्या केली हे पोलिसांना कळू शकलेले नाही. घटनास्थळावरून सुसाईड नोटदेखील मिळाली नसल्याची माहिती पोलिसांनी दिली. त्याचा फोन व इतर दस्तावेजांची चाचपणी करून त्याने हे पाऊल का उचलले याची चौकशी सुरू आहे.