पदाधिकाऱ्यांच्या गुप्त बैठकीवरून वादळ

जिल्हा परिषदेच्या अर्थसंकल्पाचे पुनर्नियोजन करताना सदस्यांना विश्‍वासात न घेता अध्यक्ष व पदाधिकाऱ्यांनी मंगळवारी गुप्त बैठक घेतली.

नागपूर : जिल्हा परिषदेच्या अर्थसंकल्पाचे पुनर्नियोजन करताना सदस्यांना विश्‍वासात न घेता अध्यक्ष व पदाधिकार्‍यांनी मंगळवारी गुप्त बैठक घेतली. यात अर्थसंकल्पातील उपलब्ध तरतूद व मागील वर्षाचा अखर्चित निधी आपल्या सर्कलमध्ये कसा नेता येईल. यावर दोन तास मंथन झाल्याची चर्चा आहे. यावरून जि.प.मध्ये वादळ उठले आहे.

अध्यक्ष संध्या गोतमारे, उपाध्यक्ष चंद्रशेखर चिखले यांच्यासह सभापती वंदना पाल, वर्षा धोपटे, दुर्गावती सरियाम व नंदा लोहबरे आदी या बैठकीला उपस्थित होते. अर्थसंकल्पाचे पुनर्नियोजन व मागील वर्षाचा अखर्चित निधी यावर चर्चा झाली. महिला व बालकल्याण विभागाचा निधी मोठय़ा प्रमाणात अखर्चित आहे. नियोजनात अखर्चित निधी समाविष्ट न केल्याने घोळ निर्माण झाला आहे. अर्थसंकल्पातील तरतूद व खर्चाचे नियोजन यात तफावत असल्याने याची जुळवाजुळव सुरू आहे. वास्तविक सेस फंडातील विभागावार उपलब्ध निधीचे नियोजन करण्याचे अधिकार त्या-त्या समित्यांना आहेत.

जि.प.च्या सेस फंडातील निधीचे वाटप करताना सदस्यांवर अन्याय होणार नाही याची जबाबदारी पदाधिकार्‍यांची असते. परंतु अध्यक्षांनी विरोधी पक्षनेते,सत्ता पक्षनेते यांना विश्‍वासात घेतले नाही. पक्षातील ज्येष्ठ सदस्यांना विचारणा करता त्यांनाही या बैठकीची कल्पना नव्हती. वृत्तपत्रातील बातमीतून माहिती मिळाल्याची सांगून त्यांनी या गुप्त बैठकीवर नाराजी व्यक्त केली. जि.प.चा कारभार पारदश्री असावा असे मत व्यक्त केले. (प्रतिनिधी)