अभय लांजेवार
लोकमत न्यूज नेटवर्क
उमरेड : घरातील सर्वच सदस्य कोरोनाबाधित असताना आईच्या मृत्यूचा चटका लावणारा प्रसंग. पती-पत्नी एकाच कोविड सेंटरमध्ये आणि पतीने शेवटचा श्वास घेतला, हे पत्नीलाही कळले नाही. या दवाखान्यातून त्या दवाखान्यात नेत असतानाच काही सेकंदातच गेलेला जीव. आताच लाडक्या मित्राने व्हाॅट्सॲपवर चॅटिंग केले आणि क्षणातच त्याच्या मृत्यूची बातमी कळली. पायाखालची वाळूच सरकविणाऱ्या अशा असंख्य घटना प्रत्येकाच्या अवतीभवती दररोज घडत आहेत. कोरोनाने मृत्यू झाल्यानंतर अंत्यविधीसाठी खांदेकरीही नाहीत. आकटं पकडणारे रक्ताचे कुणीही नाही. ‘राम नाम सत्य’ म्हणणारी मागची रांगही गायब... अशातही उमरेड नगरीत ५९ कोरोनाने मृत्यू पावलेल्यांवर अंत्यसंस्काराचा विधी पार पडला. ना रक्तसंबंधातील कुणी, ना मित्र ना आप्तस्वकीय ना शेजारी तरीही त्यांचे प्रेत जळाया लागले.
उमरेड येथील एका शववाहिका चालकाच्या या ‘नॉनस्टॉप’ सेवाभावाचे खरोखरच ‘जिगरबाज’ असेच वर्णन करावे लागेल. परसोडी उमरेड येथील दिनेश पंढरी मेहरकुरे असे या जोखीम पत्करून ७ बाय २४ तास सेवा पुरविणाऱ्या चालकाचे नाव आहे. दिनेश मेहरकुरे हे सुमारे १० वर्षांपासून शववाहिका चालवीत आहेत. भगतसिंग नागरी सहकारी पतसंस्था व स्वरगंधा सांस्कृतिक संस्थेच्या वतीने उमरेड परिसरात एकमेव शववाहिका कार्यरत आहे. अतिशय अल्पदर आकारून संस्था ही सेवा अविरतपणे देत आहे. या शववाहिकेचे सारथी बनत दिनेश मेहरकुरेसुद्धा एकमेव चालक म्हणून अखंडपणे रात्री-अपरात्री सेवाकार्य पार पाडत आहेत.
कोरोनाच्या पूर्वी परिस्थिती वेगळी होती. प्रेत हलवायला. इकडून तिकडे नेण्यासाठी आणि खांदा देण्यासाठी अनेक हात मदतीला धावत-पळत होते. आता वर्षभरापासून प्रेत उचलायला माणसेच मिळत नसल्याने आम्ही त्यांचे मित्र आणि आम्हीच त्यांचे नातेवाईक होतो, अशा हळव्या प्रतिक्रिया दिनेश मेहरकुरे यांनी ‘लोकमत’जवळ व्यक्त केल्या. कधी दिवसभरात पाच तर कधी दहा प्रेत अंत्यविधीसाठी न्यावे लागतात. आतापर्यंत एका दिवशी १३ प्रेत दिनेश यांना न्यावे लागले. एक प्रेत स्मशानभूमीत पोहचवीत नाही तर तोच दुसऱ्या मृत्यूची बातमी कानावर येते. मागील १० वर्षात अशा घटना कधीही घडल्या नाहीत. मी २४ तास सेवा देत राहणार. पैसा महत्त्वाचा नाही. सेवा महत्त्वाची आहे. मदतीसारखे दुसरे पुण्य कोणतेच नाही, अशा भावना दिनेश मेहरकुरे यांनी व्यक्त केल्या.
.....
यांचीही साथ लाखमोलाची
सध्या कोरोना काळात कोविड सेंटरमधून मृतांना अंत्यविधीसाठी घेऊन जाणे. सर्वतोपरी मदत करणे आदी कामे दिनेश मेहरकुरे करतात. भगतसिंग पतसंस्थेच्या सर्व पदाधिकाऱ्यांचीही हिंमत त्यांना नेहमीच मिळते. सोबतच विकास उराडे, रवी समुद्रे, अजय खोटे, अनिल येवले, मोनल डहाके, पवन उराडे, रवी उपाध्याय, वृषभ हुमणे, गजू नंदनवार, दिलीप रंगारी यांचीही लाखमोलाची साथ या सत्कार्यात मिळते.
....
मागील दहा वर्षात आमच्या चालकाने कधीही रजा घेतली नाही. या शववाहिकेचे ते एकमेव सारथी आहेत. सोबतच कोरोनाच्या कठीण काळात त्यांना जसे जमेल तशी सेवा ते पार पाडतात. त्यांच्या या संपूर्ण कार्याचा आम्हास अभिमान आहे.
- अरविंद हजारे, सचिव, भगतसिंग नागरी सहकारी पतसंस्था, उमरेड