राज्यातील वन्यजीवांच्या डीएनएची तपासणी आता नागपुरात ()

लोकमत न्यूज नेटवर्क

नागपूर : राज्यातील वन्यजीवांच्या डीएनएची तपासणी आता नागपुरातही करता येईल. राज्य सरकारने सोमवारी अर्थसंकल्प सादर करताना याची घोषणा केली. नागपूर येथील प्रादेशिक न्याय सहायक वैज्ञानिक प्रयोगशाळेमध्ये ‘वन्यजीव डीएनए तंत्रज्ञान विभाग’ सुरू करण्यास मंजुरी प्रदान करण्यात आली. वन्यक्षेत्रांमध्ये वाघ आणि बिबट्यांची आपसात लढाई होऊन त्यांचा मृत्यू होणे, त्यांची शिकार होणे किंवा अपघातात त्यांचा मृत्यू झाल्यावर पोस्टमार्टमसोबतच त्यांच्या डीएनएची तपासणीही केली जाते. अनेकदा वाघ, वाघिणीच्या मृत्यूनंतर त्यांच्यापासून दुरावलेल्या छाव्यांची ओळख पटविण्यासाठी डीएनए तपासणीचे विशेष महत्त्व आहे. परंतु आतापर्यंत ही तपासणी महाराष्ट्रात होत नव्हती. वन्यजीवांचे रक्त नमुने हैदराबादच्या सीसीएमबी प्रयोगशाळेत पाठविले जातात. तिथे नमुने पाठविण्याचा खर्च आणि तपासणीचा खर्चही अधिक येतो. तसेच वन विभागाला एकेक नमुन्याचा अहवाल यायला दोन ते तीन महिने प्रतीक्षा करावी लागते.

बॉक्स

वेळ आणि पैशाची होणार बचत

राज्य वन्यजीव मंडळाचे सदस्य कुंदन हाते यांनी सांगितले की, सरकारच्या या निर्णयामुळे वन विभागाला मोठी मदत मिळेल. यामुळे डीएनएची तपासणी नागपुरात होईल. त्याचा अहवाल येण्यासाठी लागणारा वेळ आणि त्यावर होणारा खर्च वाचेल.

बॉक्स

विषाची होते तपासणी

नागपूरच्या प्रादेशिक न्याय सहायक वैज्ञानिक प्रयोगशाळेमध्ये सध्या वन्यजीवांना विष देऊन मारले असेल तर त्याची तापसणी केली जाते. यामुळे वन्यप्राण्यांच्या मृत्यू प्रकरणाच्या तपासात मदत मिळते.

बॉक्स

‘गोंडवाना थीम पार्क’ही होणार

बाळासाहेब ठाकरे गोरेवाडा आंतरराष्ट्रीय प्राणी उद्यानात ‘गोंडवाना थीम पार्क’ व इतर सफारीलाही हिरवी झेंडी मिळाली आहे. गोरेवाडाचे विभागीय व्यवस्थापक प्रमोद पंचभाई यांच्यानुसार वॉकिंग ट्रेल भागात गोंड व्हिलेज बनविण्यात आले आहे. आता ऑर्कियॉलॉजिकल पार्कसह गोंड राज्यकालीन पेंटिंग्स व साहित्य, वस्तूंसह थीम पार्क निर्देशानुसार तयार करण्यात येईल.