एनआयएकडून शर्मा जेरबंद होताच निकटस्थ गेला सुट्टीवर

तपास यंत्रणात चर्चेचे मोहोळ : वरिष्ठांनी साधली चुप्पी

नरेश डोंगरे !

लोकमत न्यूज नेटवर्क

नागपूर : एन्काऊंटर स्पेशलिस्ट, वादग्रस्त माजी पोलीस अधिकारी प्रदीप शर्मा याच्या अटकेनंतर त्याचा खासमखास असलेल्या नागपुरातील एका अधिकाऱ्यासह दोघे एनआयए (राष्ट्रीय तपास यंत्रणा)च्या रडारवर असल्याची शीर्षस्थ सूत्रांची माहिती आहे. दोन दिवसांपासून या संबंधाने पोलीस दलात चर्चेचे मोहोळ उठले आहे. ते कानावर पडताच नागपुरातील वादग्रस्त अधिकारी सुट्टीवर गेल्याने उलटसुलट चर्चेला उधाण आले आहे.

ॲन्टेलियासमोर ठेवण्यात आलेली स्फोटके भरलेली कार आणि मनसुख हिरेनची झालेली हत्या देशभर चर्चेचा विषय ठरली आहे. या प्रकरणात राष्ट्रीय तपास यंत्रणेने गुरुवारी वादग्रस्त माजी पोलीस अधिकारी प्रदीप शर्माला अटक केली. सध्या तो एनआयएच्या कोठडीत आहे. शर्माच्या चौकशीतून झालेल्या धक्कादायक खुलाशानुसार त्याचे खासमखास असलेले एक वरिष्ठ आणि कनिष्ठ असे दोन अधिकारी रडारवर आल्याची खास सूत्रांची माहिती आहे. त्यातील एक अधिकारी सध्या नागपुरात कार्यरत आहे. बिल्डरकडून अडीच कोटी रुपयांची खंडणी वसूल केल्याचा आरोप झाल्यामुळे त्याची गडचिरोली रेंजमध्ये बदली करण्यात आली होती. अनिच्छेने का होईना तो अधिकारी गेल्या महिन्यात येथे रुजू झाला. हा अधिकारी प्रदीप शर्मा आणि मुंबईचे माजी पोलीस आयुक्त परमबीर सिंग यांचा अत्यंत निकटस्थ मानला जातो. गुरुवारी एनआयएने शर्माला अटक केल्यानंतर त्याचे अनेक निकटस्थ हादरले. नागपुरातील या अधिकाऱ्यानेसुद्धा तडकाफडकी बदलीवर जाण्याचा निर्णय घेतला. त्यासाठी त्याने भावनिक कारण पुढे केल्याचे समजते. सूत्रांनी दिलेल्या माहितीनुसार, हा अधिकारी सध्या मुंबईत असून तो एनआयएच्या रडारवर असल्यामुळे तो परत नागपूरला परतणार की नाही, याबाबत कुणी भाष्य करायला तयार नाही. पुढे काय घडामोडी होऊ शकतात, त्यासंबंधाने तपास यंत्रणांमध्ये तर्कवितर्क लावले जात आहेत.

---

तोंडावर बोट!

विशेष म्हणजे यासंदर्भाने उलटसुलट चर्चेला उधाण आले असले तरी कुणीही खुलून बोलायला तयार नाहीत. तो विषय आपल्या अखत्यारीत नसल्याची सूचक प्रतिक्रिया संबंधित वरिष्ठ देत आहेत.

----