नायलॉन मांजाविरोधात ‘सोशल’ अभियान

पक्षिमित्रांच्या वेगवेगळ्या संस्था, संघटना तसेच वैयक्तिक स्तरावरही प्रयत्न चालविले जात आहेत. यातीलच ग्रोविल फाऊंडेशन हा तरुणांचा ग्रुप दरवर्षीप्रमाणे यावेळीही सक्रिय झाला आहे. वेगवेगळ्या स्तरावर काम करणाऱ्या पक्षिमित्रांनी एकत्रित येत हे नायलॉन मांजाविरोधात अभियान छेडले आहे. या ग्रुपमध्ये सर्पमित्र, प्राणिमित्र, तज्ज्ञ डॉक्टर्स, जखमी पक्ष्यांसाठी बचाव पथक राबविणारे कार्यकर्ते तसे वेगवेगळ्या क्षेत्रात काम करणाऱ्या पक्षिप्रेमींचा समावेश आहे. अ‍ॅड़ लक्ष्मी मालेवार, आकाश जगताप, दिप्तांशू खरबडे, हिमांशू कांबळे, शिरीन चिमथानवाला, माधुरी इंगळे, चेतन पांडे, पीयूष छाबडिया आदी तरुणांनी यावर्षी या अभियानाची जबाबदारी घेतली असून १०० च्यावर सक्रिय तरुण या मदतकार्यासाठी सरसावले आहेत.

तज्ज्ञांकडून घेतले प्रशिक्षण

जखमी पक्ष्यांना वाचविण्यासाठी तज्ज्ञ मार्गदर्शकांकडून प्रशिक्षण घेण्यात आल्याचे आकाश जगताप याने सांगितले. अर्बन रेस्क्यू विशेषज्ञ राजेश चिटणीस यांच्याकडून झाडांवर किंवा उंच ठिकाणी अडकलेल्या पक्ष्यांना काढण्याचे ट्रेनिंग घेण्यात आले. पशुतज्ज्ञांद्वारे जखमी पक्ष्यांना कसे हॅन्डल करावे, याचे प्रशिक्षण देण्यात आले. मदतकार्य त्वरित पाेहचेल, यासाठी प्रत्येक भागात प्रतिनिधी राहील, याबाबत व्यवस्था करण्यात आली.

साेशल मीडियावर नायलाॅन प्रचार

लाेकमतशी बाेलताना डाॅ. अभिक घाेष यांनी साेशल मीडियावर हाेत असलेल्या नायलाॅन मांजा विक्रीबाबत खंत व्यक्त केली. फेसबुक व ॲमेझाॅनसारख्या ऑनलाईन साईटवर सर्रासपणे नायलाॅन मांजाची जाहिरात केली जात आहे. व्हाॅट्सॲपवर शेअर करून खरेदी करण्यासाठी प्रचार केला जात आहे. महापालिकेच्या टीमद्वारे या तंत्रावर नजर ठेवून कारवाई करण्याची गरज त्यांनी व्यक्त केली.