- तर कसे बांधायचे घरकूल?

ब्रिजेश तिवारी

कोंढाळी : शासनाने गरीब लोकांना पक्के घर उपलब्ध करून देण्याकरिता घरकूल योजना सुरू केली. कोंढाळी येथे शासनाने ४९७ घरकुले मंजूर केली. पण या घरकुलांच्या यादीत अनेक घोळ असल्याने घरे बांधावी तरी कशी असा प्रश्न कोंढाळी ग्रामपंचायत प्रशासनाला पडला आहे. घरकूल योजनेंतर्गत घर बांधण्याकरिता १ लाख २० हजार रुपये रक्कम व महात्मा गांधी रोजगार हमी योजनेंतर्गत श्रमदानाचे १८ हजार असे एकूण १ लाख ३८ हजार रुपये प्रती लाभार्थ्यांना मिळतात.

शासनाने कोंढाळी येथे २०२०-२१ करिता ४९७ घरकूल मंजूर केले. पण यातील १४० लाभार्थ्यांची घरे वनविभाग व खासगी जमिनीवर अतिक्रमण करुन बांधली आहेत. ६६ लाभार्थ्यांचा जागेबाबत वाद सुरू आहे. १८ लाभार्थ्यांकडे पूर्वीच सिमेंट काँक्रीटची पक्की घरे आहेत. १५ लाभार्थ्यांच्या घरकुलाकरिता नावे तर आली. पण लाभार्थी कोंढाळी गावातच राहत नाही. ७ लाभार्थ्यांची नावे अशी आहेत की पती-पत्नी दोघांचाही मृत्यू झाला आहे. ४ निराधार वृद्धांना घरकुलांची गरज आहे. त्यांची नावेही यादीत आहेत पण कोंढाळीचे सरपंच केशव धुर्वे, उपसरपंच स्वप्नील व्यास व ग्रामविकास अधिकारी दिलीपसिंह राठोड यांनी या लाभार्थ्यांकडे वारंवार चकरा मारूनही ते घर बांधण्यास तयार नाहीत. याबाबत कोंढाळी ग्रामपंचायतकडून प्रकल्प संचालक ग्रामीण विकास यंत्रणा यांना कळविण्यात आले. तेव्हा त्यांनी प्रत्यक्ष घरकूल बांधण्याची गरज असलेल्या निराधार ४ लोकांच्या घरांची प्रत्यक्ष पाहणी करून त्यांना घर बांधण्याची विनंती केली. तरी हे लाभार्थी घर बांधण्यास तयार नसल्याची माहिती पुढे आली.

महसूल विभागाने पट्टे वाटप करावे

वनजमिनी व खासगी जमिनीवर अतिक्रमण असल्याने घर बांधकामाकरिता निधी देता येत नाही असे कोंढाळीचे सरपंच केशव धुर्वे व उपसरपंच स्वप्नील व्यास यांनी स्पष्ट केले आहे. महसूल विभागाने लोकांना पट्टे वाटण्याकरिता १५७ प्लॉट राखून ठेवले होते. पण गेल्या २५ वर्षांत लोकांना प्लॉटचे वितरणच केले नाही. यानंतर जवळपास १२५ प्लॉटवर लोकांनी अतिक्रमण करुन घरे बांधली आहेत. येथे ३० प्लॉट शिल्लक आहेत. ही जमीन महसूल विभागाने कोंढाळी ग्रामपंचायतीला दिली तर गरजू लोकांना घरकूल बांधकाम करण्यासाठी येथे प्लॉट उपलब्ध करून देता येतील, असे ग्रा.पं.चे म्हणणे आहे.