नागपूर : अंकल-अंकल म्हणून नेहमीच खेळण्यासाठी घरी जात असलेल्या चार वर्षांच्या चिमुकलीवर नराधम युवकाची वाईट नजर गेली. त्याने तिच्यावर अत्याचार केला. त्रास होत असल्याने चिमुकलीने आपल्या आईला आपबिती सांगितली अन् आरोपीचे बिंग फुटले. एमआयडीसी पोलिस ठाण्याच्या हद्दीत घडलेल्या या घटनेत पोलिसांनी आरोपी नराधम युवकाला अटक करून गजाआड केले आहे.
शेख शहजाद शेख शाहिद (१९, रा. भरमा, जि. शिवनी, मध्यप्रदेश, ह. मु. एमआयडीसी नागपूर) असे अटक करण्यात आलेल्या नराधमाचे नाव आहे. तो एका वेल्डींगच्या दुकानात काम करतो. आरोपी आणि पिडीत चार वर्षांची चिमुकली आपल्या आईवडिलांसह एकाच घर मालकाकडे किरायाने राहतात. चिमुकलीची आई गृहिणी असून वडिल आॅटोचालक आहेत. शेजारीच राहत असल्यामुळे चिमुकली नेहमीच खेळता-खेळता आरोपी नराधमाच्या खोलीत जात होती. तो नेहमी तिला चॉकलेट देऊन खोलीत तिच्यासोबत खेळत होता. दरम्यान आरोपीने दोन-तीन वेळा चिमुकलीसोबत अश्लील कृत्य केले.
आरोपीने अश्लील कृत्य केल्यामुळे चिमुकलीला त्रास होत होता. शुक्रवारी रात्री चिमुकलीला त्रास होत असल्यामुळे आरोपीने केलेले अश्लील कृत्य आपल्या आईला सांगितले. चिमुकलीने सांगितल्यानंतर तिच्या आईच्या पायाखालील वाळुच सरकली. तिच्या आईने लगेच आपल्या चिमुकलीला घेऊन एमआयडीसी ठाण्यात तक्रार दिली. एमआयडीसी ठाण्याचे सहायक पोलिस निरीक्षक संजय बनसोड यांनी आरोपी विरुद्धकलम ३७६ (ए, बी), ३७६ (२) (एन), सहकलम ४, ६ पोक्सोनुसार गुन्हा दाखल करून आरोपीला अटक केली आहे.