लोकमत न्यूज नेटवर्कनागपूर : ती वर्धेची अन् तो मूळचा वणीजवळचा. दोघेही शिक्षित. तो नागपुरात चांगल्या पगाराच्या सरकारी नोकरीवर. त्याचे अन् तिचे लग्न जुळले. साक्षगंध झाले अन् लग्नाची तिथीही काढण्यात आली. तो सुखी वैवाहिक जीवनाचे स्वप्न रंगवू लागला, मात्र त्याच्या स्वप्नांचा चुराडा झाला. त्याने तिच्या मोबाईलमध्ये तिची प्रियकरासोबत नको त्या अवस्थेतील चित्रफीत बघितली अन् त्याचे भावविश्व उजाडले. पाप उघड झाल्यानंतर ती जास्तच शिरजोर झाली. तिने आणि तिच्या मैत्रिणीने त्या तरुणाला जगणे मुश्किल करण्याची धमकी देणे सुरू केले. तिच्याकडून होणारा त्रास असह्य झाल्याने अखेर बुधवारी सकाळी त्याने आत्महत्या केली. एखाद्या चित्रपटातील सूडकथा वाटावी अशी ही घटना नागपुरात घडली आहे. चेतन संजयराव पोटदुखे (वय २८) असे मृत तरुणाचे नाव आहे.पोलिसांनी दिलेल्या माहितीनुसार, वणी (जि. यवतमाळ) जवळच्या चिखलगाव येथील चेतन पोटदुखे रिझर्व्ह बँकेत नोकरीवर होता. नोकरीच्या निमित्ताने अत्रे लेआऊटमधील आरबीआय कॉलनीत तो राहत होता. चांगली नोकरी आणि चांगल्या पगाराच्या तरुण मुलाच्या लग्नासाठी त्याच्या कुटुंबीयांनी स्थळ शोधणे सुरू केले. मध्यस्थांमार्फत वर्धा येथील पायल आकरे (वय २६) हिचे स्थळ आले. चेतन आणि पायलचे ३० एप्रिल २०१८ ला साक्षगंध झाले अन् २ जुलै २०१८ ला लग्न करण्याचे निश्चित झाले. दोन्ही पक्षाकडून लग्नाची तयारी सुरू झाली. इकडे पायल चेतनच्या रूमवर येऊन थांबू लागली. तो भावी पत्नी म्हणून तिचे आतापासूनच लाड पुरवू लागला. जाताना सोबत पैसेही देऊ लागला. काही दिवसांपूर्वी ती अशीच चेतनच्या रूमवर आली. ती बाथरूमला गेली असता चेतनने तिचा सहजपणे मोबाईल हाताळला अन् त्याच्या डोक्यावर आभाळ कोसळले. जिच्यासोबत तो पत्नी म्हणून जीवन जगण्याचे स्वप्न बघत होता ती तिच्या प्रियकरासोबत नको त्या अवस्थेत त्याला दिसली. ते पाहून त्याने तिला विचारणा केली. पायलने जुने सर्व विसरून नवा संसार बसवण्याची गोष्ट न करता चेतनसोबत निर्ढावलेपणाने वागली. त्यामुळे त्याने तिच्यासोबतचे लग्न तोडले.धमक्या अन् बरेच काहीलग्न तोडण्याचे कारण सगळ्यांना कळल्याने ती सूडाने पेटून उठली. तिने तिच्या पुण्यातील रुतूजा नामक मैत्रिणीसोबत संगनमत करून चेतनवर सूड उगविणे सुरू केले. ती त्याला वारंवार फोन करून धमक्या देऊ लागली. नको त्या भाषेत बोलतानाच त्याचे जगणे मुश्किल करण्याची भाषा ती चेतनसोबत बोलताना वापरत होती. खोट्या आरोपात गोवण्यासाठी पोलिसात तक्रार देण्याचीही ती धमकी देत होती. या एकूणच प्रकारामुळे चेतन कमालीचा व्यथित झाला. तिच्या धमक्यांना कंटाळून त्याने बुधवारी सकाळी गळफास लावून आत्महत्या केली.सहा पानांची सुसाईड नोटत्याच्या आत्महत्येचे वृत्त कळताच त्याचे आईवडील आप्तस्वकीयांसह नागपुरात पोहचले. चांगला मुलगा, चांगल्या पगाराची नोकरी असलेला अन् तीन आठवड्यांवर लग्न आलेले असताना चेतनने आत्महत्या केल्याने त्याचे कुटुंबीय हादरले. त्यांनी आत्महत्येमागचे कारण जाणून घेण्याचा प्रयत्न केला. चेतनने गळफास लावण्यापूर्वी सहा पानांची सुसाईड नोट लिहून ठेवली. त्यात त्याने आत्महत्या करण्यामागची खुलासेवार पार्श्वभूमी लिहिली. ती वाचून चेतनचे वडील संजयराव पोटदुखे यांनी बजाजनगर ठाण्यात तक्रार नोंदवली. सुसाईड नोटमधील चेतनची व्यथा अन् त्याने केलेल्या आरोपावरून हवलदार विनोद क्षीरसागर यांनी आरोपी पायल आकरे आणि रुतूजा या दोघींविरुद्ध चेतनला आत्महत्येस प्रवृत्त केल्याच्या आरोपावरून गुन्हा दाखल केला. या घटनेला आता ३६ तास झाले मात्र आरोपींना अटक झालेली नव्हती.