नागपूर : नराधम बापाने स्वत:च्याच साडेतीन वर्षाच्या मुलीवर लैंगिक अत्याचार केल्याची लज्जास्पद घटना नागपुरात समोर आली आहे. आरोपीने मुलीच्या हत्येची धमकी दिल्यानंतर तिच्या आईने तीन महिन्यांनंतर तक्रार दाखल केली आहे. हुडकेश्वर पोलीस ठाण्याच्या हद्दीत ही घटना घडली व या प्रकरणाने पोलीसदेखील सुन्न झाले.
हुडकेश्वर पोलीस ठाण्याच्या हद्दीत राहणारी संबंधित महिला स्वत:चा व्यवसाय चालविते. तिचा पती महिला आणि दोन्ही निष्पाप मुलींना मारहाण करायला लागला. महिला आणि तिची आई ब्यूटी प्रोडक्ट्स विकण्यासाठी पहाटे घरून निघायचे. मुली आरोपीसोबत घरातच राहत होत्या. २८ मे रोजी महिला लवकर घरी परतली. घरात प्रवेश करताच तिला तिचा पती तिच्या साडेतीन वर्षाच्या मुलीसह आक्षेपार्ह हरकती करताना दिसला. तिने त्याला फटकारले असता पतीने वाद घालण्यास सुरुवात केली. पोलिसांत तक्रार करण्याचा इशारा दिल्यावर त्याने महिलेला मारहाण करून घटस्फोटाची धमकी दिली व तो कुटुंबासह बोरगाव येथे गेला.
काही दिवसांनी घरी परतल्यावर महिलेने केलेल्या कृत्याबाबत त्याच्याकडे विचारपूस केली. त्यानंतर आरोपीने परत तिला मारहाण करण्यास सुरुवात केली. पीडितेने चैतन्य या सामाजिक संस्थेच्या सुनीता ठाकरे आणि हाफीज साबरी यांना आपबिती सांगितली. त्यांच्या मदतीने हुडकेश्वर पोलीस ठाण्यात तक्रार दाखल करण्यात आली. पोलिसांनी विनयभंग, मारहाण, धमकावणे आणि पॉक्सो अंतर्गत गुन्हा दाखल केला आहे.
आरोपीने क्रौर्याची सीमा ओलांडली
आरोपी पित्याने क्रौर्याची सीमा ओलांडली होती. त्याने महिलेच्या मोठ्या मुलीच्या अंगावर चटके दिले होते. यासंदर्भात पत्नीने प्रश्न विचारला असता, ही माझी मुलगी नाही, असे सांगून तो लहान मुलीला घेऊन बोरगाव येथे आई-वडिलांच्या घरी गेला. दोन दिवसांनी मुलीला घरी आणल्यावर आरोपीही तिला मारहाण न करण्याचे आश्वासन देऊन घरी परतला. मोठ्या मुलीचे लैंगिक शोषण उघडकीस येताच त्याने लहान मुलीचा गळा दाबण्याचा प्रयत्न केला होता.
पत्नीवरदेखील लग्नाअगोदर केला होता अत्याचार
ती १६ वर्षांची असताना तिची नराधम आरोपीशी ओळख झाली. लग्नाच्या बहाण्याने त्याने तिच्यावर अत्याचार केला होता. सदर पोलिसांनी तेव्हा गुन्हा दाखल करून आरोपीला अटक केली होती. यादरम्यान मुलगी गरोदर राहिली. त्याने लग्नाची तयारी दाखवल्यानंतर मुलीने बलात्कार प्रकरणात तडजोड केली होती. लग्न आणि मुलगी झाल्यामुळे महिला आरोपीसोबत राहू लागली. पुढे तिने दुसऱ्या मुलीलाही जन्म दिला.