‘तिच्या’साठी तयार झाला सेवेचा सेतू

कन्हान : लॉकडाऊनमुळे अनेकांचे संसार उघड्यावर आले. रोजगार बुडाले. रोजगारासाठी सर्वत्र भटकंती सुरू आहे. अशात कुणाच्या घरी एखादा सदस्य गंभीर आजारी झाल्यास संर्पूण कुटुंब चिंतेने व्याकुळ होते. मात्र, गरजवंतांना मदत करणारे काही लोक आजही समाजात असल्याने गरिबांच्या जगण्याच्या आशा बळावल्या आहेत. असाच एक प्रसंग पारशिवनी तालुक्यात घडला आहे. एका १६ वर्षीय मुलीला जीवदान देण्यासाठी टेकाडी-कन्हान-कामठी अशी एक मानवतेची साखळी निर्माण झाली. या मुलीवर शस्त्रक्रिया होऊन ती सध्या सुखरूप आहे.

पारशिवनी तालुक्यात खदान क्रमांक ३ येथे ठाकूर दाम्पत्य राहते. त्यांची १६ वर्षीय मुलगी पूनम अपेंडिक्सच्या आजाराने गत वर्षभरापासून त्रस्त होती. उपचार म्हटलं की, मोठ्या रकमेचे आकडे डोळ्यादेखत फिरू लागतात. मात्र, आर्थिक परिस्थिती बेताची असल्याने मुलीच्या ऑपरेशनचा खर्च झेपणार नसल्याने ठाकूर दाम्पत्याने मदतीचा हात समाजापुढे केला. ते टेकाडी येथील सरपंच सुनीता मेश्राम यांच्याकडेही गेले. पालकांनी मुलीच्या आजाराची माहिती मेश्राम यांना दिली. मेश्राम यांनी लगेच दखल घेत कन्हान प्राथमिक आरोग्य केंद्राचे डॉ. योगेश चौधरी यांना याबाबत माहिती दिली. डॉ. चौधरी यांनी मुलीची तपासणी केली असता त्वरित शस्त्रक्रिया करणे आवश्यक असल्याचे पालकांना सांगितले. त्यांनी विलंब न करता मुलीला कामठी येथील आशा हॉस्पिटल येथे नेले. याचदरम्यान पूनमच्या शस्त्रक्रियेसाठी लागणारे पैसे तिच्या पालकाकडे नसल्याची माहिती कामठी येथील समाजसेवक रंजित चंद्रवंशी यांनी मिळाली. त्यांनी शासकीय योजनेंतर्गत उपचार होण्यासाठी कागदोपत्री पूर्तता पूनमच्या पालकांना करून दिली. आशा हॉस्पिटलचे डॉ. सौरभ अग्रवाल यांनी पूनमवर यशस्वीरीत्या शस्त्रक्रिया करत आजारातून मुक्त केले. पूनमच्या पालकांच्या या लढ्यात आशा हॉस्पिटलचे व्यवस्थापक राम येरपुडे, डॉ. वर्मा, रविना मेश्राम, कल्याणी पुणेकर, सरपंच सुनीता मेश्राम, टिंकू सिंग, राहुल उके, अरविंद ओझा, त्रिभुवन सिंग यांनी सहकार्य केले.