अंथरूण पाहून पाय पसरणार!

लोकमत न्यूज नेटवर्क

नागपूर : कोविड-१९ मुळे महापालिकेची आर्थिक स्थिती ढासळली आहे. मागील दोन वर्षापासून प्रभागातील विकास कामे ठप्प आहेत. याचा विचार करता मनपाची आर्थिक स्थिती सुधारण्यासाठी प्रयत्न केले जाईल. अंथरूण पाहून पाय पसरावे लागतील. मनपा आयुक्तांनी अर्थसंकल्प सादर केल्यानतंर महिनाभरात स्थायी समितीचा अर्थसंकल्प सादर करणार असल्याची माहिती स्थायी समितीचे नवनिर्वाचित अध्यक्ष प्रकाश भोयर यांनी सोमवारी पदभार स्वीकारल्यानंतर दिली.

यावेळी महापौर दयाशंकर तिवारी, सत्तापक्ष नेता अविनाश ठाकरे, माजी आमदार अनिल सोले, मावळते अध्यक्ष विजय झलके यांच्यासह पदाधिकारी उपस्थित होते. पत्रकारांशी चर्चा करताना भोयर म्हणाले, पुढील वर्ष निवडणुकीचे असल्याने आव्हानात्मक आहे. लोकहिताची कामे करावी लागतील. यासाठी सर्वांना सोबत घेऊन विकास कामे केली जाईल. सर्व वर्गाला न्याय देण्याचा प्रयत्न करू. वर्ष १९८७-८८ भाजपचा कार्यकर्ता होतो. २०१७ मध्ये पहिल्यांदा नगरसेवक झालो. पक्षाने जबाबदारी सोपविली. ती पार पाडण्याचा प्रामाणिक प्रयत्न करू.

...

जनहिताचे प्रकल्प प्रशासनाने रोखले : झलके

विजय झलके म्हणाले, ६ मार्च २०२० रोजी अध्यक्षपदाची सूत्रे स्वीकारली. २२ मार्चला जनता कर्फ्यू लागला. त्यानंतर सर्व कालावधी कोविड संक्रमणात गेला. विकास कामे अपेक्षित गतीने झाली नाही. प्रथमच तोट्याचा अर्थसंकल्प दिला. अनेक अडचणीनंतरही २७६ कोटींची कामे करण्यात यश आले. परंतु काही जनहिताचे प्रकल्प प्रस्तावित होते. त्यावर खर्चही फारसा होणार नव्हता. दुर्दैवाने प्रशासनाने हे प्रस्ताव रोखले. यात चालता-फिरता दवाखाना, मनपाचे स्वतंत्र पोलीस स्टेशन, प्रत्येक झोनमध्ये शीतपेटी अशा उपक्रमांचा यात समावेश होता. परंतु प्रशासनाच्या अडेलतट्टू भूमिकेमुळे या योजना अंमलात आणता आल्या नाही, अशी खंत झलके यांनी व्यक्त केली.