सफाई कर्मचाऱ्यांची पालकमंत्र्यांच्या घरावर धडक ()

लोकमत न्यूज नेटवर्क

नागपूर : मनपा कर्मचाऱ्यांप्रमाणे सफाई कर्मचाऱ्यांना सातवा वेतन आयोग, लाड-पागे समितीच्या शिफारशी लागू कराव्या, कार्ड हरवलेल्यांना दुसरे कार्ड द्यावे, शासकीय सुटीच्या दिवसाची मजुरी मिळावी व कोरोना कालावधीत सेवा देताना मृत्यू झालेल्या सफाई कामगारांच्या वारसांना नियमानुसार आर्थिक मदत द्यावी, अशा मागण्यांसाठी मनपातील सफाई कामगारांनी रविवारी नगरसेवक सतीश होले यांच्या नेतृत्वात पालकमंत्री नितीन राऊत यांच्या घरावर धडक देत धरणे आंदोलन केले. मनपा प्रशासनाकडे सफाई कामगारांच्या मागण्यांसंदर्भात वेळोवेळी मागणी करूनही न्याय मिळत नसल्याचे होले यांनी निदर्शनास आणले.

कर्मचाऱ्यांना सातवा वेतन आयोग लागू करण्यात आला आहे. सफाई कर्मचाऱ्यांना सातवा वेतन आयोग लागू करणे, लाड-पागे समितीच्या शिफारशींची अंमलबजावणी, नवीन कार्डचे वाटप व मृतांच्या वारसांना भरपाई देण्यासंदर्भात मनपा आयुक्तांची लवकरच चर्चा करण्याची ग्वाही पालकमंत्री नितीन राऊत यांनी यावेळी दिली. मनपा प्रशासनाला काही अडचणी आल्यास राज्य सरकारकडून समस्या मार्गी लावण्याची ग्वाही त्यांनी दिली. आंदोलनात मोठ्या संख्येने सफाइं कर्मचारी सहभागी झाले होते.