नागपूर : जिल्हाधिकारी कार्यालयातील बचत भवन सभागृहाला लवकरच नवा चेहरा (लूक) मिळणार आहे. इमारत नुतनीकरणाच्या तयारीला सुरुवातही झाली आहे. जिल्हाधिकारी कार्यालयात जिल्हाधिकार्‍यांच्या कक्षाच्या मागच्या बाजूला बचत भवन सभागृह आहे. महसूल खात्याच्या बैठका, जिल्हा व नियोजन समितीच्या बैठका आणि कर्मचार्‍यांच्या प्रशिक्षणाचे कार्यक्रम या सभागृहात घेतले जातात. मात्र गेल्या काही वर्षापासून देखभाल दुरुस्तीकडे दुर्लक्ष झाले. नियमितपणे न होणारी रंगरंगोटी, फर्निचरची मोडतोड, पावसाळ्यात साचणारे पाणी, गळणार्‍या भिंती यामुळे सभागृहाची दूरवस्था झाली होती. मात्र त्याही अवस्थेत सभागृहाचा वापर नियमित होत होता. लोकसभा निवडणुकीच्या काळातही सभागृहात अधिकार्‍यांच्या बैठका, कर्मचार्‍यांचे प्रशिक्षणाचे कार्यक्रम झाले. या काळातच जिल्हाधिकारी अभिषेक कृष्णा यांच्या नजरेस सभागृहाची दूरवस्था आली. त्यानंतर नुतनीकरणाच्या हालचाली सुरू झाल्या. सध्या सभागृहातील संपूर्ण फर्निचर बाहेर काढण्यात आले आहे. तेथील खुर्च्या विविध विभागात पाठवण्यात आल्या आहेत. पुढच्या काळात आहे त्या जागेवरच नवीन सभागृह उभे झालेले दिसेल. त्याचा ‘लूक’ गडचिरोलीतील सभागृहासारखा असण्याची दाट शक्यता आहे. नवीन सभागृहात नवीन खुर्च्यांसह इतर फर्निचरही नवीन असेल. त्याची रचनाही बदललेली असेल. सूत्रांनी दिलेल्या माहितीनुसार १९८४ मध्ये या सभागृहाचे बांधकाम करण्यात आले होते. अल्पबचत निधीतून हे बांधकाम करण्यात आल्याने त्याचे नावही बचत भवन ठेवण्यात आले. त्यानंतर होत असलेले हे दुसरे नुतनीकरण आहे. यापूर्वी २००६ मध्ये तत्कालीन महसूल मंत्री नारायण राणे व तत्कालीन पालकमंत्री सतीश चतुर्वेदी यांच्या हस्ते नुतनीकरण झालेल्या सभागृहाचे उद््घाटन झाले होते. (प्रतिनिधी)
बचत भवनाचा मेकओव्हर होणार
By admin | Updated: May 12, 2014 00:59 IST