ग्रामीण पोलिसांचे संकेतस्थळ ‘नो अपडेट’

मोठा गाजावाजा करून नागपूर ग्रामीण पोलिसांनी ‘वेबसाईट’ सुरू केली. सुमारे सात महिन्यांपूर्वी सुरू केलेल्या या वेबसाईटमध्ये वेळोवेळी ‘अपडेट’ करण्यात आले नाही. तसेच ज्या कामासाठी ही वेबसाईट

चुकीचा नामोल्लेख : सात महिन्यांपासून फारशा सुधारणा नाही
गणेश खवसे - नागपूर
मोठा गाजावाजा करून नागपूर ग्रामीण पोलिसांनी ‘वेबसाईट’ सुरू केली. सुमारे सात महिन्यांपूर्वी सुरू केलेल्या या वेबसाईटमध्ये वेळोवेळी ‘अपडेट’ करण्यात आले नाही. तसेच ज्या कामासाठी ही वेबसाईट उपयोगात येईल, असे सांगितले होते, ते कार्य अद्यापही सुरू झालेले नाही. परिणामी नागपूर ग्रामीण पोलिसांचे काम आजही ‘आॅफलाईन’च सुरू आहे.
नागपूर शहर पोलिसांप्रमाणेच अत्याधुनिक आणि पोलिसांविषयी माहिती देण्याच्या उद्देशाने २७ जानेवारी २०१४ रोजी एका छोटेखानी कार्यक्रमात तत्कालीन पोलीस अधीक्षक डॉ. मनोजकुमार शर्मा यांच्या हस्ते ‘नागपूर पोलीस डॉट ओआरजी’ या वेबसाईटचे लोकार्पण करण्यात आले. या वेबसाईटवर पोलिसांशी संबंधित सर्वच माहिती मिळणार असून, थेट पोलीस अधीक्षकांशी ‘कनेक्ट’ होता येईल, असे त्यावेळी सांगण्यात आले होते. पोलीस दैनिक वार्तापत्र (प्रेस नोट), जवळचे पोलीस ठाणे, पोलीस ठाणे आणि ठाणेदार, पोलीस ठाण्याचे छायाचित्र, महत्त्वाच्या लिंक, पदभरती, विशेष एकके (स्पेशल युनिट), नागपूर परिक्षेत्रातील पोलीस ठाण्यांचे दूरध्वनी क्रमांक, पोलिसांशी संबंधित कायदे आदी महत्त्वाच्या बाबींचा यात समावेश करण्यात आल्याचेही नमूद केले होते. यापैकी पोलीस ठाणे, नागपूर परिक्षेत्रातील पोलीस ठाण्यांचे दूरध्वनी क्रमांक, पोलिसांशी संबंधित कायदे, महत्त्वाच्या लिंक, सायबर सेफ्टी, मिशन, जबाबदाऱ्या यासह इतर काही अपडेट करण्यात आले. मात्र वेळोवेळी इतर बदल करण्यात न आल्याने या संकेतस्थळाला भेट देणाऱ्यांची फसगत होते.
या वेबसाईटवर पदक्रम (हायरार्की) हा ३२ अधिकाऱ्यांचा देण्यात आला आहे. त्यातील केवळ १३ अधिकारी सध्या त्या पदावर कार्यरत आहे. १९ अधिकाऱ्यांची बदली झाली आहे. त्यात अतिरिक्त पोलीस अधीक्षक प्रकाश जाधव, उपविभागीय पोलीस अधिकारी वसंत शिरभाते, संतोष वानखेडे, मोक्षदा पाटील, सूर्यभान इंगळे यांच्यासह कामठीचे ठाणेदार विकास वाघ, कन्हानच्या सुनीता मेश्राम, मौद्याचे एम. के. तायडे, खापरखेड्याचे सय्यद इकबाल, रामटेकचे किशोर गवई, पारशिवनीचे विवेक जीवने, देवलापारचे हृदयनारायण यादव, अरोलीचे भोयर, उमरेडचे सुरेश भोयर, कुहीचे प्रकाश हाके, भिवापूरचे रमाकांत दुर्गे, सावनेरचे अशोक जांभळे, कळमेश्वरचे संभाजी मेहेत्रे, खाप्याचे डहाळे या ठाणेदारांची इतरत्र बदली झाली आहे. त्यास दोन महिन्यांपेक्षा जास्त कालावधी झाला असला तरी नागपूर ग्रामीण पोलिसांच्या ‘वेबसाईट’वर तेच ठाणेदार म्हणून कार्यरत दर्शविले आहे. एवढेच काय तर सध्याचे लाचलुचपत प्रतिबंधक विभागाचे अधीक्षक प्रकाश जाधव हे अतिरिक्त पोलीस अधीक्षक म्हणून ‘जैसे थे’ असून त्यांचे छायाचित्रही कायम आहे.
मराठीने उडविला गोंधळ
ही वेबसाईट इंग्रजीव्यतिरिक्त बंगाली, गुजराती, हिंदी, कन्नड, मल्याळम, मराठी, स्वाहिली, तामीळ, तेलगू आणि उर्दू या भाषांमध्ये पाहण्याची व्यवस्था करण्यात आली आहे. मात्र मराठीत ही वेबसाईट पाहताना अनेक हास्यापद प्रकार समोर येतात. ‘लोकेट युवर पोलीस स्टेशन’चे ‘आपले पोलीस स्टेशनचे स्थानबद्ध’ असा थेट अनुवाद करण्यात आले. त्यासोबतच पदक्रम (हायरार्की)मध्ये नाव इंग्रजीत, आडनाव मराठीत; नाव मराठीत, आडनाव इंग्रजीत केले गेले असून कुहीचे ठाणेदार प्रकाश हाके (तत्कालीन) आणि केळवदचे आर. टी. चव्हाण यांच्या नावाचे भाषांतर करताना हा हास्यास्पद प्रकार नेमका लक्षात येतो. हाके यांचा नामोल्लेख ‘श्री प्रकाश मासे वाळविण्याची लाकडी चौकट’ असे तर आर. टी. चव्हाण यांचा उल्लेख ‘रिकी चौहान’ असा करण्यात आला आहे.
पोलीस वार्तापत्र ‘बाय मेल’
नागपूर ग्रामीण पोलिसांनी विविध कामांसाठी या वेबसाईटचा उपयोग करण्यात येईल सांगितले होते, त्यापैकी एक होते दैनंदिन पोलीस वार्तापत्र! यात दररोज पोलीस वार्तापत्र (प्रेसनोट) उपलब्ध करून देण्यात येईल, असे सांगितले होते. मात्र अद्याप एकही पोलीस प्रेसनोट वेबसाईटवर उपलब्ध नाही. याबाबत एकदा तत्कालीन पोलीस अधीक्षक डॉ. शर्मा यांना विचारणा केल्यावर त्यांनी प्रेस नोट मेलवर पाठविण्याचा उपक्रम ६ मार्चपासून राबविला. सध्याही याच पद्धतीचा उपयोग करण्यात येत आहे.