रामटेक काॅंग्रेस नंबर वन

राहुल पेटकर

लाेकमत न्यूज नेटवर्क

रामटेक : शिवसेनेचा गड मानल्या जाणाऱ्या रामटेक तालुक्यात नऊपैकी सात ग्रामपंचायतींवर काॅंग्रेस गटाने विजयी पताका फडकावली आहे. भारतीय जनता पक्षाच्या कार्यकर्त्यांनी काॅंग्रेस समर्थित गटांना आतून मदत केल्याने हे शक्य झाले आहे. एक ग्रामपंचायत शिवसेना समर्थित छत्रपती शिवाजी आघाडीकडे, तर एक ग्रामपंचायत भाजप समर्थित गटाकडे गेली आहे. रामटेक तालुक्यातील जिल्हा परिषदेचे तीन सर्कल काॅंग्रेसकडे असून, भाजप व शिवसेनेकडे प्रत्येकी एक सर्कल आहे. येथे पंचायत समितीने पाच सर्कल काॅंग्रेसकडे असून, चार सर्कल शिवसेना व एक सर्कल भाजपकडे आहे.

अनेक वर्षांपासून शिवसेना समर्थित गटाकडे असलेल्या पंचाळा (बु) येथील मतदारांनी यावेळी शिवसेना समर्थित गटाला धक्का दिला आहे. येथे एकूण ११ पैकी सात जागांवर काॅंग्रेस समर्थित गटाने बाजी मारली असून, शिवसेना समर्थित गटाला एकमेव, तर भाजप समर्थित गटाला तीन जागांवर समाधान मानावे लागले. किरणापूर येथील नऊपैकी सहा जागा काॅंग्रेस समर्थित गटाच्या वाट्याला गेल्या असून, तीन जागांवर शिवसेना समर्थित गटाचे उमेदवार विजयी झाले आहेत.

चिचाळा येथे ११ पैकी काॅंग्रेस समर्थित युवा ग्रामीण विकास आघाडीने १०, तर शिवसेना समर्थित गटाने एक जागा जिंकली. येथे काॅंग्रेस व भाजप समर्थित गटांची आघाडी हाेती. खुमारी येथे ११ पैकी काॅंग्रेस समर्थित गटाला सात, शिवसेना व भाजप समर्थित गटांना प्रत्येकी दाेन जागा मिळाल्या. शिवनी (भाेंडकी) येथे एकूण नऊ जागांपैकी काॅंग्रेस समर्थित परिवर्तन ग्रामविकास आघाडीला सहा, तर शिवसेना समर्थित आघाडीला तीन जागांवर समाधान मानावे लागले. येथेही काॅंग्रेस व भाजप समर्थित गटांनी हातमिळवणी केली हाेती. मानापूर येथे शिवसेना समर्थित छत्रपती शिवाजी आघाडीने सहा, तर परिवर्तन आघाडीने तीन जागा जिंकल्या. दाहाेदा येथे मतदारांनी काॅंग्रेस समर्थित गटाच्या झाेळीत नऊ जागा टाकल्या.

...

देवलापारमध्ये भाजपचा सफाया

देवलापार ग्रामपंचायतीवर मागील काही वर्षांपासून भाजप समर्थित गटाची सत्ता हाेती. या निवडणुकीत काॅंग्रेस समर्थित गटाने १३ पैकी ११ जागांवर विजय संपादन केला असून, भाजप समर्थित गटाला केवळ दाेन जागांवर समाधान मानावे लागले. त्यामुळे या ग्रामपंचायतीवर भाजप समर्थित गटाचा सफाया झाला आहे.

...

मनसेने खाते उघडले

पथरई येथे काँग्रेस समर्थित गटाला पराभवाला सामाेरे जावे लागले असून, येथे महाराष्ट्र नवनिर्माण सेना समर्थित गटाने खाते उघडले आहे. येथे काॅंग्रेस समर्थित गटाला दाेन, तर भाजप समर्थित गटाला पाच जागा मिळाल्या आहेत. दाेन जागांवर मनसे समर्थित गटाने विजय संपादन केला आहे.