लोकमत न्यूज नेटवर्कनागपूर : रात्रीच्या वेळी किराणा दुकानावर कब्जा करून भल्या सकाळी दुकानदारावर चाकूहल्ला करण्याचा प्रयत्न करणाऱ्या एका गुंडाला परिसरातील नागरिकांनी संघटितपणे प्रत्युत्तर दिले. मोठ्या प्रमाणावर नागरिकांनी धाव घेतल्यामुळे हातात चाकू घेऊन दहशत पसरविणारा गुंड सुसाट पळून गेला. तर, आपल्या गुंड मुलाचा बचाव करण्यासाठी आलेल्या गुंडाच्या वडिलाला संतप्त जमावाने बेदम चोप दिला. नंतर त्याचे अतिक्रमण जमीनदोस्त करण्यात आले. सक्करदरातील भांडेप्लॉट चौकात शनिवारी सकाळी घडलेल्या या घटनेमुळे परिसरात दिवसभर तणावाचे वातावरण होते. प्रकरण चिघळत असल्याचे पाहून चौकात पोलिसांचा प्रचंड बंदोबस्त लावण्यात आला होता.
दोन, तीन महिन्यांपासून त्याचा उपद्रव वाढल्याने नागरिकांच्या मनात असंतोष खदखदत होता. या पार्श्वभूमीवर, शनिवारी पहाटे त्याने जयंतीलाल जैन नामक व्यापाऱ्याच्या किराणा आणि जनरल स्टोअर्सच्या शटरचे कुलूप तोडून त्या दुकानाला आपले कुलूप लावले. नेहमीप्रमाणे जैन आज सकाळी दुकान उघडण्यासाठी आले असता त्यांना त्यांच्या कुलूपाऐवजी भलतेच कुलूप दुकानाच्या शटरला लागून दिसले. त्यामुळे त्यांनी ते कुलूप तोडण्याचा प्रयत्न केला असता गुंड बंटी खान जैन यांच्या अंगावर धावून आला. जैन यांनी यावेळी त्याला समजावण्याचा प्रयत्न केला आणि बाजूला निघून गेले.त्यांनी आपले नातेवाईक आणि आजूबाजूच्यांना हा प्रकार सांगितला. काही वेळेनंतर ते परत दुकान उघडण्यासाठी आले असता, आरोपी बंटी खान भला मोठा चाकू घेऊन जैन यांच्यावर धावला. जीवाच्या भीतीने जैन पळत सुटले तर, गुंड बंटी खान त्यांच्या मागे धावू लागला. ते पाहून त्याच्या गुंडगिरीला त्रस्त झालेल्या परिसरातील नागरिकांच्या रोषाचा भडका उडाला. नागरिकांनी एकसाथ त्याच्याकडे धाव घेतली. काहींनी त्याला बाजूचे दगड फेकून मारले. आपली खैर नाही, हे लक्षात आल्यामुळे गुंड बंटी जीवाच्या धाकाने उलटपावली पळून गेला. या प्रकारामुळे परिसरात प्रचंड तणाव निर्माण झाला.गुंड बंटीने पहाटेच्या वेळी जैन यांच्या दुकानाला कुलूपं लावून दुकानावर कब्जा करण्याचा प्रयत्न केला. ते पाहून जमावाने त्याची कुलूपं तोडून फेकली. प्रचंड तणावाचे वातावरण असताना बंटीचे वडील जमावात आले आणि त्यांनी आपल्या मुलाच्यावतीने दिलगीरी व्यक्त करण्याऐवजी बंटीच्या बाजूने बोलू लागले. त्यामुळे जमावातील काहींनी बंटीच्या वडिलांना चोप देऊन पळवून लावले. दरम्यान, बंटीच्या चिकन सेंटर आणि पानटपरीचे अतिक्रमण उपटून फेकण्याची जमावाने तयारी केल्यामुळे चौकात प्रचंड तणाव निर्माण झाला. माहिती कळताच सक्करदऱ्याचे पोलीस निरीक्षक चंद्रकांत यादव आपल्या ताफ्यासह तेथे पोहचले. महापालिकेचे क्रीडा व सांस्कृतिक सभापती नागेश सहारे, नगरसेविका स्नेहल बिहरे, रिता मुळे, अतिक्रमण विभागाचे अधिकारी आपल्या पथकासह तेथे पोहचले. सहायक आयुक्त हरीश राऊत यांनीही घटनास्थळी धाव घेतली. या सर्वांनी जमावाला शांत करण्याचा प्रयत्न केला. परिस्थिती चिघळण्याचा धोका लक्षात घेऊन राखीव दलाचे जवानही बंदोबस्तासाठी बोलवून घेण्यात आले. त्यानंतर गुंड बंटी खानची पानटपरी, चिकन सेंटर आणि त्याने केलेले अतिक्रमण सर्वच जमीनदोस्त करण्यात आले.अक्कूची पुनरावृत्ती टळलीजैन यांच्यामागे चाकू घेऊन धावणारा गुंड बंटी खान संतप्त जमावाच्या हातात लागला असता तर शहरात पुन्हा एकदा अक्कू यादव प्रकरणाची पुनरावृत्ती झाली असती. जीव मुठीत घेऊन आरडाओरड करीत तो पळून गेल्याने बचावला. दरम्यान, जैन यांनी दिलेल्या तक्रारीवरून सक्करदरा पोलिसांनी बंटी खानविरुद्ध अनधिकृतपणे दुकानाचा ताबा घेण्याचा प्रयत्न केल्याचा गुन्हा दाखल करण्यात आला. तो फरार असून, पोलीस त्याचा शोध घेत आहेत.