नागपूर : एका सॉफ्टवेअर कंपनीच्या पिकअप वाहनाखाली येऊन श्वानाच्या पिल्लाचा मृत्यू झाल्यामुळे संतापलेल्या अज्ञात इसमाने संबंधित वाहनावर दगडफेक केली. यात सॉफ्टवेअर कंपनीतील महिला जखमी झाली तर चालकालादेखील मारहाण करण्यात आली. बेलतरोडी पोलीस ठाण्याच्या हद्दीत ही घटना झाली.
शेख मोहसीन शेख हारून (३०, बेलतरोडी) असे संबंधित चालकाचे नाव आहे. तो हेक्सावेअर टेक्नॉलॉजी प्रा.लि.या कंपनीच्या कर्मचाऱ्यांच्या पिकअप-ड्रॉपचे काम करतो. बुधवारी रात्री साडेनऊच्या सुमारास तो पिकअपसाठी गेला होता. मनीषनगरातील प्रभूनगर येथे अन्नपुर्णा अपार्टमेंटजवळ त्याच्या वाहनाखाली येऊन श्वानाच्या पिल्लाचा मृत्यू झाला. ते पाहण्यासाठी शेख मोहसीन खाली उतरला असता आशीष धानगोडे (३७, प्रभूनगर) याने त्याला शिवीगाळ करत मारहाण केली. त्याने गाडीच्या काचांवर दगड फेकून मारला. त्या काचांमुळे आतमध्ये बसलेली कर्मचारी साक्षी ओनकर (२३, मानेवाडा मार्ग) ही जखमी झाली.
वाहनातील विशाल सोनी हा मध्यस्थी करण्यासाठी आला असता आरोपीने त्यालादेखील मारहाण केली. त्यानंतर आरोपी घटनास्थळावरून फरार झाला. जखमी साक्षीला एम्स रुग्णालयात नेण्यात आले. शेख मोहसीनच्या तक्रारीवरून आशीषविरोधात बेलतरोडी पोलीस ठाण्यात गुन्हा दाखल करण्यात आला आहे.