भंडारा रोडवरील परिस्थितीची माहिती द्या

भंडारा रोडवरील अनधिकृत पारडी बाजार, फेरीवाले, फूटपाथवरील अतिक्रमण इत्यादी समस्या

हायकोर्ट : याचिकाकर्त्याला एक आठवड्याचा वेळ
नागपूर : भंडारा रोडवरील अनधिकृत पारडी बाजार, फेरीवाले, फूटपाथवरील अतिक्रमण इत्यादी समस्या सोडविण्यासाठी आतापर्यंत काय कारवाई करण्यात आली, सध्याची परिस्थिती काय आहे, समस्या दूर करण्यासाठी काय उपाययोजना करता येतील इत्यादी माहितीचे सर्वसमावेशक प्रतिज्ञापत्र सादर करण्याचे निर्देश मुंबई उच्च न्यायालयाच्या नागपूर खंडपीठाने बुधवारी संबंधित याचिकाकर्त्यास दिलेत. तसेच, याचिकाकर्त्याचे प्रतिज्ञापत्र आल्यानंतर त्यावर पुढील दोन आठवड्यांत भूमिका मांडावी, असे महानगरपालिका व अन्य प्रतिवादींना सांगितले.
याप्रकरणी व्यावसायिक अनिल आग्रे यांनी जनहित याचिका दाखल केली आहे. प्रशासनातर्फे नियमित कारवाई करण्यात येत नसल्यामुळे भंडारा रोडवर आताही बाजार भरतो. फेरीवाले उभे राहतात. दोन्ही बाजूच्या फूटपाथवर मेकॅनिकचा ताबा आहे. रोडच्या दोन्ही बाजूला २४ तास ट्रक उभे असतात. यामुळे वाहतुकीला अडथळा निर्माण होतो. रोडला लागून मद्यविक्रीची ६ दुकाने आहेत. परिणामी स्त्रियांनाही प्रचंड त्रास सहन करावा लागतो. दुपारी ३ ते रात्री ९ वाजतापर्यंतची परिस्थिती अत्यंत भयंकर असते असे याचिकाकर्त्याचे म्हणणे आहे. याचिकाकर्त्यातर्फे अ‍ॅड. भानुदास कुलकर्णी यांनी बाजू मांडली. (प्रतिनिधी)