२०.३० लाखाचा मुद्देमाल जप्त

लाेकमत न्यूज नेटवर्क

उमरेड : पाेलिसांनी उमरेड शहराच्या परिसरात असलेल्या बायपास चाैकात केलेल्या कारवाईमध्ये रेतीची विना राॅयल्टी वाहतूक करणारा टिप्पर पकडला. त्यात चालकास अटक करण्यात आली असून, त्याच्याकडून रेती व टिप्पर असा एकूण २० लाख ३० हजार रुपये किमतीचा मुद्देमाल जप्त केला. ही कारवाई नुकतीच करण्यात आली.

गाैरव ताराचंद तुमडे (२१, रा. ताराेली, ता. कुही) असे अटक करण्यात आलेल्या आराेपी टिप्पर चालकाचे नाव आहे. उमरेड पाेलिसांचे पथक गस्तीवर असताना त्यांना उमरेड परिसरातून नागपूर शहराच्या दिशेने रेतीची वाहतूक केली जात असल्याची माहिती मिळाली हाेती. त्यामुळे त्यांनी शहरालगतच्या बायपास चाैकात नाकाबंदी करून वाहनांची तपासणी करायला सुरुवात केली. यात त्यांनी एमएच-४०/बीजी-०८८९ क्रमांकाचा टिप्पर थांबवून झडती घेतली. त्यात रेती असल्याचे निदर्शनास येताच कागदपत्रांची तपासणी केली.

ती रेती विना राॅयल्टी वाहून नेली जात असल्याचे चाैकशीत स्पष्ट हाेताच, टिप्पर चालक गाैरव तुमडे यास अटक केली. त्याच्याकडून २० लाख रुपये किमतीचा टिप्पर आणि ३० हजार रुपयाची सहा ब्रास रेती असा एकूण२० लाख ३० हजार रुपये किमतीचा मुद्देमाल जप्त केला. याप्रकरणी उमरेड पाेलिसांनी भादंवि ३७९ अन्वये गुन्हा नाेंदविला असून, या घटनेचा तपास सहायक पाेलीस निरीक्षक राजीव लाेले करीत आहेत. ही कारवाई परीविक्षाधीन पाेलीस उपअधीक्षक सुजितकुमार क्षीरसागर यांच्या नेतृत्वातील पथकाने केली.