एकाच छताखाली बजेटमध्ये प्रॉपर्टीज

मध्य भारतातील सर्वश्रेष्ठ ‘लोकमत प्रॉपर्टी एक्सपो’मध्ये नामांकित कंपन्यांनी संपूर्ण नागपुरातील सर्वोत्तम घरकुलाचे प्रकल्प सादर केले असून ग्राहकांचा उत्स्फूर्त प्रतिसाद मिळत आहे.

लोकमत प्रॉपर्टी एक्स्पोमध्ये विविध पर्याय : आज अखेरचा दिवस
नागपूर : मध्य भारतातील सर्वश्रेष्ठ ‘लोकमत प्रॉपर्टी एक्सपो’मध्ये नामांकित कंपन्यांनी संपूर्ण नागपुरातील सर्वोत्तम घरकुलाचे प्रकल्प सादर केले असून ग्राहकांचा उत्स्फूर्त प्रतिसाद मिळत आहे. बजेटमध्ये आवडीचे घरकूल आणि दुकान खरेदीची संधी आहे.

प्लॉट, फ्लॅट, बंगले, रो-हाऊसेस, पेंट हाऊस
तीन दिवसीय एक्स्पोचे आयोजन सिव्हिल लाईन्स येथील वसंतराव देशपांडे सभागृहाच्या मैदानावर १२ फेब्रुवारीपासून करण्यात आले. एक्स्पो सकाळी ११ ते रात्री ९ वाजेपर्यंत खुला राहील. १४ फेब्रुवारी अखेरचा दिवस आहे. ग्राहकांना एकाच छताखाली १५ लाखांपासून २ कोटींपर्यंतचे निवासी प्रकल्प कागदोपत्री न्याहाळता येणार आहे. विविध कंपन्यांनी प्लॉट, फ्लॅट, बंगले, रो-हाऊसेस, पेंट हाऊस आणि व्यावसायिक दुकाने प्रदर्शित केली आहेत. पहिल्या दोन दिवसात हजारो लोकांनी डेव्हलपर्स व बिल्डर्स आणि राष्ट्रीयकृत बँकांच्या स्टॉलला भेट दिली. ग्राहकांना हव्या त्या परिसरात प्रॉपर्टी निवडीची संधी आहे.

आकर्षक आॅफर व खरेदीचे पर्याय
प्रदर्शनात नामांकित कंपन्या आणि बँकांचे २४ स्टॉल आहेत. सर्व स्टॉलवर कंपन्यांचे मालक आणि अधिकारी प्रकल्पाची माहिती देत आहेत. अनेकजण कुटुंबीयांसह प्रदर्शनाला भेट देत आहेत. एवढेच नव्हे तर काही जणांनी प्रॉपर्टी खरेदी केल्याची माहिती आहे. एक्स्पोला भेट देणारे खरेदीसाठी इच्छुक असणारेच ग्राहक आहेत. भेट देणारे पुढे बजेटमध्ये घर खरेदी करतातच, असा अनुभव स्टॉलधारकांनी कथन केला. प्रदर्शनात व्यवसायाच्या विपुल संधी असल्याचे मत स्टॉलधारकांनी लोकमतशी बोलताना व्यक्त केले. एक्स्पोमध्ये खाद्यान्नांचे स्टॉल असून पार्किंगची विस्तृत व्यवस्था आहे. प्रवेश आणि पार्किंग नि:शुल्क आहे. विविध स्टॉलवर प्रॉपर्टी संदर्भातील कायदे, मेट्रो रिजनची सीमा, प्रॉपर्टी व्यवसायातील सद्यस्थितीची माहिती देण्यात येत आहे. प्रॉपर्टीमध्ये गुंतवणूक करण्यास इच्छुक असलेल्यांची गर्दी आहे.