सराफा दुकान लुटण्याचा डाव उधळला

लोकमत न्यूज नेटवर्क

नागपूर - सराफा दुकान फोडून ऐवज लुटण्याच्या तयारीत असलेल्या सशस्त्र गुंडांना यशोधरानगर पोलिसांनी जेरबंद केले. त्यांच्याकडून घातक शस्त्रे जप्त करण्यात आली. त्यांचे दोन साथीदार मात्र अंधाराचा लाभ उठवत पळवून गेले. महेश ऊर्फ सोनू राजकुमार कुसेरे (वय २४, रा. बारानल चाैक), हिमांशु मोहन सोरते (वय २०, रा. कांजीहाऊस चाैक), रूपेश ऊर्फ नव्वा धनराज येनुरकर (वय २४, रा. कुंदनलाल गुप्तानगर) आणि राहुल राजू हटेवार (वय २०, रा. कुंदनलाल गुप्तानगर), अशी आरोपींची नावे आहेत.

यशोधरानगरचे पोलीस पथक शनिवारी रात्री गस्तीवर असताना त्यांना रविवारी पहाटे २ च्या सुमारास यादवनगरातील स्वीपर कॉलनीजवळच्या वाचनालयाशेजारी काही सशस्त्र गुन्हेगार दडून असल्याची माहिती मिळाली. त्यावरून पोलिसांनी तेथे त्यांना गराडा घातला. यातील उपरोक्त चार गुन्हेगार पोलिसांच्या हाती लागले. अंधाराचा फायदा घेऊन दोघे मात्र पळून गेले. पकडलेल्या गुन्हेगारांकडून पोलिसांनी दोन तलवारी, एक चाकू, मिरची पूड, चार मोबाईल आणि पल्सर असा एकूण १ लाख १७ हजाराचा ऐवज जप्त केला. त्यांच्याविरुद्ध विविध कलमानुसार गुन्हा दाखल करून त्यांना अटक करण्यात आली.

मोठा गुन्हा टळला

रविवारी सकाळी अटकेतील आरोपींची ठाणेदार अशोक मेश्राम यांनी चाैकशी केली असता, त्यांनी यादवनगरातील साैरभ ज्वेलर्स हे सराफा दुकान लुटण्याच्या इराद्याने तेथे जमलो होतो, अशी कबुली दिली. पोलिसांनी वेळीच त्यांना जेरबंद केल्यामुळे मोठा गुन्हा टळला. त्यांनी यापूर्वी आणखी कोणते गुन्हे केले, त्याची आता पोलीस चाैकशी करीत आहेत.

परिमंडळ - ५ चे उपायुक्त नीलोत्पल, सहायक आयुक्त रोशन पंडित यांच्या मार्गदर्शनाखाली ठाणेदार अशोक मेश्राम यांच्या नेतृत्वात उपनिरीक्षक जितेंद्र भार्गव, उपनिरीक्षक नसिमुन शेख, एएसआय प्रकाश आणि त्यांच्या सहकाऱ्यांनी ही कामगिरी बजावली.

---