खेड्यात संक्रमणाचा टक्का वाढतोय...

काटोल/सावनेर/कळमेश्वर/हिंगणा/कुही/रामटेक/नरखेड : नागपूर जिल्ह्यातील नगर परिषद क्षेत्रात कोरोनाबाधितांची संख्या वाढली आहे. शहरी भागातील संक्रमण आता गावागावात पोहोचत आहे. जिल्ह्यातील १३ तालुक्यात गुरुवारी २८८ रुग्णांची नोंद झाली. लग्नसमारंभ आणि बाजारातील वाढत्या गर्दीवर नियंत्रण ठेवण्यात न.प. प्रशासन अपयशी ठरल्याने ग्रामीण भागात कोरोनाचा प्रादुर्भाव वाढल्याचे दिसून येत आहे.

काटोल तालुक्यात गुरुवारी ३७ रुग्णांची नोंद झाली. यात काटोल शहरातील २९ तर ग्रामीण भागातील ८ रुग्णांचा समावेश आहे. शहरात पंचवटी येथे सहा, जानकी नगर (५), राठी ले-आऊट, सरस्वतीनगर, रामदेवबाबा ले-आऊट येथे प्रत्येकी दोन तर हनुमान मंदिर, काळे ले-आऊट, नगर भवन, गॅस गोडाऊन, द्वारका नगरी, लक्ष्मीनगर, सतनाम ले-आऊट, नबिरा ले-आऊट, चांडकनगर, अनसूयापुरम, साठवणे ले-आऊट, आययुडीपी येथे प्रत्येकी एका रुग्णाची नोंद झाली. ग्रामीण भागामध्ये खानगाव येथे तीन, ढिवरवाडी येथे दोन तर घरतवाडा, मूर्ती, कोंढाळी येथे प्रत्येकी एका रुग्णाची नोंद झाली.

सावनेर शहरातील विविध चाचणी केंद्रांवर गुरुवारी २५० जणांच्या चाचण्या करण्यात आल्या. तीत २५ जणांचे अहवाल पॉझिटिव्ह आले. यात सावनेर शहरातील २१ तर केळवद, उमरी, बोरुजवाडा आणि नागपूर येथील एका रुग्णाचा समावेश आहे.

हिंगणा तालुक्यात ३१ रुग्णांची पुन्हा भर पडली आहे. यात वानाडोंगरी (१३), डिगडोह (५), रायपूर (५), सावंगी देवळी (२) तर देवळी सावंगी, कवडस, नीलडोह, हिंगणा, अडेगाव, शिरुळ येथील प्रत्येकी एका रुग्णाचा समावेश आहे. तालुक्यात आतापर्यंत कोरोनाबाधितांची संख्या ४,१६३ झाली आहे. यातील ४,००३ रुग्ण कोरोनामुक्त झाले आहेत.

नरखेड तालुक्यात गुरुवारी १३ रुग्णांची नोंद झाली. यात न.प. क्षेत्रातील ३ तर ग्रामीण भागातील १० रुग्णांचा समावेश आहे. सध्या ग्रामीण भागातील अ‍ॅक्टिव्ह रुग्णांची संख्या ८६ तर शहरात ४५ इतकी झाली आहे. गुरुवारी मेंढला येथे आठ तर जलालखेडा येथे दोन रुग्णाची नोंद झाली.

कळमेश्वर तालुक्यात आणखी १४ रुग्णांची भर पडली आहे. यात कळमेश्वर-ब्राह्मणी न.प. क्षेत्रात एक तर ग्रामीण भागातील तिष्टी येथे ६, धापेवाडा (५), बोरगाव बु. येथील दोन रुग्णांचा समावेश आहे.

---

मांढळ व वेलतूर येथेही संक्रमण

कारोनामुक्तीकडे वाटचाल करीत असलेल्या कुही तालुक्यात संक्रमणाचा वेग वाढताना दिसतो आहे. तालुक्यातील ग्रामीण भागातील प्राथमिक आरोग्य केंद्रांतर्गत करण्यात आलेल्या चाचण्यात मांढळ व वेलतूर येथे प्रत्येकी चार रुग्णांची नोंद करण्यात आली. मांढळ प्रा.आ. केंद्रांतर्गत पारडी येथे ग्रामपंचायत कार्यालयात घेण्यात आलेल्या शिबिरात २० रुग्णांची चाचणी करण्यात आली. यात चार जणांचे अहवाल पॉझिटिव्ह आल्याची माहिती डॉ. रचना नागदेवे व उपसरपंच नरेश शुक्ला यांनी दिली.

--

रामटेकमध्ये आठ रुग्णांची भर

रामटेक तालुक्यात गुरुवारी आठ रुग्णांची भर पडली. यात रामटेक शहरातील भगतसिंग वॉर्ड येथे दोन तर ग्रामीण भागात शिवनी येथे पाच तर बेलदा येथे एका रुग्णाची नोंद झाली. तालुक्यात आतापर्यंत कोरोनाबाधितांची संख्या १०९८ इतकी झाली आहे. यातील ९८१ रुग्ण कोरोनामुक्त झाल्याची माहिती तहसीलदार बाळासाहेब मस्के यांनी दिली.