फूटपाथवरील अतिक्रमणे हटविली, सहा ट्रक साहित्य जप्त ()

नागपूर : महापालिकेच्या अतिक्रमण विरोधी पथकाने शहरातील १० झोनमध्ये गुरुवारी ४०० पेक्षा अधिक अतिक्रमणधारकांना हटविण्याची कारवाई केली.

लक्ष्मीनगर झोनमध्ये रहाटे कॉलनी चौक ते लक्ष्मीनगर चौक, सोमलवाडा चौक ते रहाटे कॉलनी चौकापर्यंतची ५२ अतिक्रमणे हटविण्यात आली. यावेळी एक ट्रक साहित्य जप्त करण्यात आले. धरमपेठ झोन अंतर्गत सिव्हिल लाईन्सच्या मिठा निम दरगाह ते लागूनच असलेल्या फूटपाथवरील अतिक्रमणधारकांचे शेड हटविण्यात आले. त्यानंतर आकाशवाणी चौक ते जिल्हाधिकारी कार्यालय व व्हिसीए मैदानापर्यंत कारवाई करण्यात आली. यावेळी अतिक्रमण धारकांकडून ५ हजार रुपये दंड वसूल करण्यात आला. त्याचप्रमाणे महापालिका मुख्यालयासमोरील फूटपाथवरून चहाची दुकाने आणि ठेले हटविण्यात आले. या दुकानदारांकडून ७ हजार रुपये दंड वसूल करण्यात आला. हनुमाननगर झोन अंतर्गत तिरंगा चौक ते सक्करदरा चौकापर्यंत अतिक्रमण करणाऱ्यांचे एक ट्रक साहित्य जप्त करण्यात आले. त्यानंतर तुकडोजी पुतळा चौक ते मानेवाडा चौकापर्यंत फूटपाथवरील ५६ अतिक्रमण हटवून एक ट्रक साहित्य जप्त करण्यात आले. धंतोली झोन अंतर्गत त्रिशरण चौक ते नरेंद्रनगर चौक, मनिषनगर चौक ते तुकडोजी पुतळा चौक आणि वंजारीनगर चौक, कॉटन मार्केट ते सुभाषनगर, मेडिकल चौक ते टीबी वॉर्ड चौकातील ७२ अतिक्रमणे हटविण्यात आली. या भागातही एक ट्रक साहित्य जप्त करण्यात आले. वसंतनगरात संजय मुरमोरे यांची रस्त्यापर्यंत असलेली भिंत पाडण्यात आली.

.................