Nagpur News | Latest Nagpur News in Marathi | Nagpur Local News Updates | ताज्यबातम्या नागपूर | नागपूर समाचार | Nagpur Newspaper

चांदी घोटाळा प्रकरण : कसा होईल निपटाराराहुल अवसरे - नागपूरसंपूर्ण राज्याच्या पोलीस आणि शासकीय यंत्रणेत खळबळ माजविणाऱ्या २४ वर्षांपूर्वी घडलेल्या एका प्रकरणाचा खटला १८ वर्षांपासून सुरू असून तो तब्बल २५ न्यायालये फिरला आहे.सीताबर्डी पोलीस ठाण्याच्या मालखान्यातील मोठ्या प्रमाणावरील चांदी घोटाळ्याचा हा खटला आहे. सध्या हा खटला मिहान जमीन प्रकरणांच्या निपटाऱ्यासाठी प्रशासकीय इमारतीमध्ये स्थापन करण्यात आलेल्या तदर्थ न्यायालयाचे न्यायाधीश ए. व्ही. दीक्षित यांच्या न्यायालयात सुरू असून साक्षीपुरावे नोंदवण्यात येत आहे.जुलै १९९० मध्ये हे प्रकरण घडले. तब्बल सहा वर्षेपर्यंत या प्रकरणाचा तपास चालून ४ डिसेंबर १९९६ रोजी न्यायालयात आरोपपत्र दाखल करण्यात आले होते. तीन वर्षांनी २० सप्टेंबर १९९९ पासून सुनावणी सुरू झाली होती.या खटल्याची पार्श्वभूमी अशी, १ जुलै १९९० रोजी तत्कालीन पोलीस उपनिरीक्षक हनुमानसिंग राजपूत, अशोक चौधरी आणि त्यांच्या पथकाला केरळ एक्स्प्रेसमधून मोठ्या प्रमाणावर चांदीची तस्करी होत असल्याची माहिती मिळाली होती. ही बाब शासकीय लोहमार्ग पोलीस (जीआरपी) च्या अधिकार क्षेत्रात असतानाही या पथकाने ‘एस ५’ आणि ‘एस ६’ या दोन बोगींची झडती घेतली होती. त्यात मथुरा येथील रमेशचंद्र पन्नालाल शर्मा याच्याकडे प्रत्येकी ८० किलो चांदीच्या २ बॅग आणि १०० किलो चांदीची एक बॅग आढळली होती. हरिशंकर पूरणचंद वैश्य याच्याकडे ९५ किलो चांदी असलेली एक बॅग आढळली होती. माखनलाल रामप्रकाश अग्रवाल याच्याकडे पाच कॅन्व्हास बॅग आढळल्या होत्या. त्यात ४८५ किलो चांदी होती.एकूण ८४० किलो चांदी या पथकाने जप्त केली होती. त्यावेळी जप्त चांदीची किंमत ५० लाख ४० हजार होती. आता ही किंमत पाच-सहा कोटींच्या घरात आहे. या सर्व पायपट्ट्या होत्या आणि त्या चेन्नईहून आणण्यात आल्या होत्या.सीताबर्डी पोलीस ठाण्याचे तत्कालीन पोलीस निरीक्षक सुधाकर अमरुळे यांनी १ लाख, उपनिरीक्षक राजपूत यांनी २० हजार आणि चौधरी यांनी ३० हजाराची लाच घेऊन २०६ किलो ९५६ ग्रॅम चांदी आरोपींजवळ ट्रान्झिट पास असल्याचे दाखवून सोडून दिली. उर्वरित ६३३ किलो ४४ ग्रॅम चांदी सीताबर्डीच्या मालखान्यात ठेवण्यात आली होती.ही चांदी त्यावेळच्या प्रथम श्रेणी न्यायदंडाधिकाऱ्याच्या न्यायालयाने आरोपी व्यापाऱ्यांच्या सुपूर्द करण्याचा आदेश २३ जुलै १९९० रोजी दिला होता. परंतु आयकर अधिकाऱ्यांनी या आदेशावर स्थगनादेश आणला होता.मालखान्यातील चांदीला हळूहळू पाय फुटून संपूर्ण अस्सल चांदी बेपत्ता करून नकली चांदी मालखान्यात ठेवण्यात आली होती.एकूण सात बॅगमध्ये ही चांदी होती. जप्तीनाम्यानुसार या चांदीचे वजन ६३३ किलो ४४ ग्रॅम एवढे असावयास पाहिजे होते. परंतु प्रत्यक्षात ते ५८५ किलो भरले होते.कुंपणच शेत खाते या म्हणीप्रमाणे खुद्द पोलीस अधिकाऱ्यांनीच चांदीचा हा प्रचंड घोटाळा केला होता. घोटाळ्याचे हे प्रकरण संपूर्ण राज्यात गाजले होते. प्रारंभी खुद्द उपायुक्त पी.के. जैन यांनी तपास केला होता. त्यानंतर आयपीएस दर्जाचे सहायक पोलीस आयुक्त संजय बर्वे यांच्याकडे हा तपास सोपविण्यात आला होता.तीन आरोपी पोलीस अधिकारीया प्रकरणात एकूण सात आरोपी असून त्यात तत्कालीन पोलीस निरीक्षक सुधाकर महादेव अमरूळे, तत्कालीन उपनिरीक्षक हनुमानसिंग बहादूरसिंग राजपूत आणि अशोक सदाशिव चौधरी यांचा समावेश आहे.मालखान्यातील चांदी घोटाळा आणि लोकसेवकांनी केलेला भ्रष्टाचार अशी दोन वेगवेगळी प्रकरणे न्यायालयात दाखल करण्यात आली होती. चांदीची विल्हेवाट लावण्याचा आरोप असलेले सीताबर्डीच्या मराठा मंदिरचे मालक रमेश घेवरचंद मोहता यास चार वर्षांपूर्वीच अतिरिक्त सत्र न्यायाधीश ए. आर. तिवारी यांनी दोषमुक्त (डिस्चार्ज) केले.प्रत्यक्ष चांदी बाळगणारे रमेशचंद्र पन्नालाल शर्मा, हरिशंकर पूरनचंद वैश्य आणि माखनलाल रामप्रकाश अग्रवाल सर्व रा. मथुरा उत्तर प्रदेश हे अद्यापही फरार आहेत.न्यायालयात सुरू असलेल्या खटल्यात पोलीस अधिकाऱ्यांच्यावतीने अॅड. वंदन गडकरी, अॅड. चंद्रशेखर जलतारे तर सरकारच्यावतीने अतिरिक्त सरकारी वकील गिरीश दुबे काम पाहत आहेत.

Nagpur (Marathi News)