Nagpur Marathi News | नागपूर मराठी बातम्या | Latest Nagpur News in Marathi | नागपूर ताज्या बातम्या | Nagpur Crime Marathi News | नागपूर ब्रेकिंग न्यूज़| Breaking & Live Nagpur News | Today's Nagpur News paper

नागपूर : संशयाने पछाडलेल्या कंत्राटदाराने आपल्या पत्नीची अमानुष हत्या केली. सोनेगाव पोलीस ठाण्याच्या हद्दीतील आनंद अर्पणनगरात गुरुवारी मध्यरात्रीनंतर ही थरारक घटना घडली.दीपक हेमाजी चंद्रिकापुरे (वय ४५) असे आरोपीचे नाव आहे. दीपक बांधकाम कंत्राटदार असून, त्याला एक मुलगा तसेच एक मुलगी आहे. या दोघांचेही लग्न झाले.दीपकच्या लग्नाला २५ वर्षे झाली. मात्र त्याच्या संशयीवृत्तीत फरक पडला नाही. घरात पत्नी निलू (वय ४२), विवाहित मुलगा, सून आणि नातू असूनही तो पत्नीवर संशय घेत होता. ४ दिवसांपूर्वी रात्री जेवण झाल्यानंतर त्याने पत्नीला गरबा बघून येऊ, असे म्हटले. पत्नीने नकार दिला. त्यामुळे तो नातवाला घेऊन गरबा बघायला गेला. मध्यरात्री परत आल्यानंतर त्याने दार ठोठावले. पत्नीने दार उघडण्यास विलंब केला. त्यामुळे त्याच्या डोक्यातील संशयाचा किडा वळवळू लागला. पत्नी निलूवर चारित्र्याचा संशय घेऊन त्याने भांडण उकरून काढले. चार दिवसांपासून त्यांच्यात भांडण सुरू होते. गुरुवारी दसऱ्याच्या दिवशी सर्वत्र आनंदोत्सव सुरू असताना दीपक भलत्याच विचाराने पेटला होता. त्याने पुन्हा भांडण सुरू केले. मध्यरात्रीपर्यंत ते सुरूच होते. मुलगा, सून यांनी त्याची समजूत काढली मात्र तो मानायला तयार नव्हता. रागारागात पत्नी निलू आपल्या समोरच्या हॉलमध्येच झोपल्या तर, आरोपी दीपक पहिल्या माळ्यावरील शयनकक्षात झोपायला गेला. मध्यरात्री १ च्या दरम्यान, सर्व झोपी गेल्याचे पाहून तो खाली उतरला. त्याने पत्नी निलूला जागे केले आणि काही कळायच्या आतच पोटावर, छातीवर गुप्तीचे सपासप घाव घालून ठार मारले. निलू यांच्या किंकाळ्यांनी बाजूच्याच शयनकक्षात झोपलेला मुलगा, सून धावत हॉलमध्ये आले. निलू रक्ताच्या थारोळ्यात वेदनांनी विव्हळत होत्या. आरोपी दीपक मात्र पळून गेला. संदीपने आपल्या आईला डॉक्टरकडे नेले. मात्र डॉक्टरांनी निलू यांना मृत घोषित केले. (प्रतिनिधी)चांगला संसार विस्कटलासंशयाचे भूत डोक्यावर बसले की कसा चांगला संसार विस्कटतो, त्याची प्रचिती या घटनेतून आली आहे. मुलगी सासरी नांदते आहे. मुलगा संदीप मोबाईलचे दुकान चालवतो. घरात सून, गोंडस नातू आणि सारखे भांडणं करूनही २५ वर्षांपासून संसाराचा गाडा रेटणारी पत्नी, असा चांगला परिवार होता. मात्र, दीपकच्या डोक्यावर बसून नाचणाऱ्या संशयाच्या भूताने अखेर त्याच्या हातून पत्नीची हत्या घडविली. या घटनेमुळे त्याच्या सुखी संसाराची घडी विस्कटली. संदीपच्या तक्रारीवरून सोनेगावचे ठाणेदार अरुण जगताप यांनी लगेच शोधाशोध करून आरोपी दीपकच्या मुसक्या बांधल्या. सहायक निरीक्षक येळे यांनी आरोपीला कोर्टात हजर करून त्याची २९ आॅक्टोबरपर्यंत कोठडी मिळवली. या घटनेमुळे परिसरात हळहळ व्यक्त केली जात आहे.

Nagpur (Marathi News)