सुरक्षा जवानांना शाळा देण्याला विरोध

राष्ट्रीय स्वयंसेवक संघाचे सरसंघचालक मोहन भागवत यांच्या सुरक्षा व्यवस्थेतील जवानांच्या निवासासाठी उंटखाना

नागपूर : राष्ट्रीय स्वयंसेवक संघाचे सरसंघचालक मोहन भागवत यांच्या सुरक्षा व्यवस्थेतील जवानांच्या निवासासाठी उंटखाना येथील महापालिके च्या डॉ. बाबासाहेब आंबेडकर माध्यमिक शाळा व ज्युनियर कॉलेजची इमारत उपलब्ध क रण्याच्या प्रस्ताव आहे. याला विरोध दर्शविण्यासाठी उंटखान्यातील नागरिकांनी सोमवारी महाल येथील मनपा कार्यालयापुढे निदर्शने करून जोरदार नारेबाजी केली.
१९५६ साली डॉ. बाबासाहेब आंबेडकर माध्यमिक शाळा सुरू करण्यात आली. त्याच वर्षात दीक्षांत सभारंभासाठी आलेले अनुयायी या शाळेत वास्तव्यास होते. या शाळेसोबत लोकांचे भावनिक नाते आहे. दुसरीकडे या शाळेत ४० विद्यार्थी शिक्षण घेत आहेत. शाळेचा निकालही चांगला आहे. मोफत शिक्षणाचा अधिकार कायद्यानुसार सर्व बालकांना जवळच्या शाळेत शिक्षणाची सुविधा उपलब्ध करणे बंधनकारक आहे. असे असतानाही सीआयएसएफ जवानांच्या निवासासाठी ही शाळा उपलब्ध करण्याचा मनपा प्रशासनाचा विचार आहे. परंतु आम्हाला हा निर्णय मान्य नसल्याचे नगरसेविका सुजाता कोंबाडे व अ‍ॅड. रेखा बाराहाते यांनी सांगितले.
सुरक्षा ताफ्यातील सीआयएसएफ जवानांच्या निवासाची व्यवस्था संघ मुख्यालयापासून जवळच्या भागात करावी लागणार आहे. त्यामुळे सुरू असलेली शाळा बंद करण्याऐवजी रेशीमबाग वा महाल परिसरात उपलब्ध असलेल्या जागेचा विचार करण्यात यावा, असे मत कोंबाडे यांनी व्यक्त केले.
सभागृहाची मंजुरी मिळण्यापूर्वीच मनपाच्या मालमत्ता विभागाने शाळा इमारत भाड्याने देण्याला सहमती दिली आहे. या शाळेचा तळमजला व पहिला मजला अशी ४९२.६२ चौ.मी. इमारत उपलब्ध करण्याचा प्रस्ताव आहे. पाच वर्षांसाठी हा करार केला जाणार आहे.
सीआयएसएफचे डेप्युटी इन्स्पेक्टर जनरल यांनी यासंदर्भात मनपाला पत्र पाठविले आहे. त्यानुसार मनपा प्रशासन कामाला लागले आहे. एक वर्षाचे भाडे अनामत रक्कम म्हणून मनपाकडे जमा करावे. भाड्यात दरवर्षी १० टक्के वाढ, वीज व पाण्याचे बिल सीआयएसएफला भरावे लागेल, अशा शर्ती मनपाने घातल्या आहेत. आंदोलनात डॉ. विठ्ठलराव कोंबाडे, विजय गायकवाड, देवीदास कामडे, किरण देवरे, अष्टदीप नगरारे, संजय मून, राजेश ढेंगरे, अरविंद महाडिक, बबलू कडवे, राजू टेंभेकर, कैलास पाटील, सुधा कामडे, बेबीताई मेंढे, संगीता खापर्डे, पुष्पा नगरारे, कुंदाताई ताकसांडे, समता कळमकर, गीता लुटे यांच्यासह उंटखान्यातील नागरिकांचा समावेश होता. (प्रतिनिधी)

विषय स्थगित
सुरक्षा जवानांना निवासासाठी शाळा उपलब्ध करण्याचा विषय सभेच्या कामकाजात समाविष्ट करण्यात आला होता. परंतु स्थानिक नागरिकांचा व नगरसेवकांचा विरोध विचारात घेता, महापौर प्रवीण दटके यांनी हा विषय स्थगित ठेवला. पुढील सभेत यावर चर्चा होणार आहे.