उद्यापासून ऑनलाईन पदव्युत्तर प्रवेशप्रक्रियेला सुरुवात

लोकमत न्यूज नेटवर्क

नागपूर : राष्ट्रसंत तुकडोजी महाराज नागपूर विद्यापीठातर्फे अखेर पदव्युत्तर अभ्यासक्रमांच्या प्रवेशप्रक्रियेचे वेळापत्रक घोषित करण्यात आले आहे. यंदादेखील केंद्रीभूत ऑनलाईन प्रवेशप्रक्रिया राहणार असून, २७ ऑगस्टपासून विद्यार्थ्यांना अर्ज भरता येणार आहेत. यंदाची प्रवेशप्रक्रिया तीन फेऱ्यांमध्ये राबविण्यात येणार आहे. अंतिम वर्षाचे निकाल जाहीर झाल्यावरदेखील प्रवेशप्रक्रिया का जाहीर होत नाही, असा सवाल विद्यार्थ्यांकडून उपस्थित होत होता व ‘लोकमत’ने देखील हा मुद्दा लावून धरला होता.

ही प्रवेशप्रक्रिया एमए, एमए (मास कम्युनिकेशन), एमकॉम, एमएस्सी, एमएस्सी (गृहविज्ञान), एमएफए (मास्टर ऑफ फाईन आर्ट्स), एमलिब (मास्टर ऑफ लायब्ररी सायन्स), एलएलएम (मास्टर ऑफ लॉ) या अभ्यासक्रमांसाठी ही प्रक्रिया असेल.

विद्यार्थ्यांना २७ ऑगस्ट ते ४ सप्टेंबर या कालावधीत अर्ज भरता येणार आहे. तर ९ सप्टेंबर रोजी अंतिम गुणवत्ता यादी जाहीर होईल. पहिल्या फेरीतील पसंतीक्रम ९ ते ११ सप्टेंबर या कालावधीत सादर करता येतील. दुसऱ्या फेरीतील पसंतीक्रम १७ ते २९ सप्टेंबर या कालावधीत भरता येतील. तर तिसरी व अखेरची असलेली समुपदेशन फेरी २८ सप्टेंबर रोजी पार पडेल.

हेल्पलाईन क्रमांकच नाही

विद्यापीठाने केवळ प्रवेशप्रक्रियेचे वेळापत्रक जारी केले आहे. मात्र प्रवेशादरम्यान कुठली कागदपत्रे अपलोड करायची आहेत, ग्रामीण भागातील विद्यार्थ्यांसाठी सुविधा केंद्र आहेत का, अडचण आल्यास कुठे संपर्क साधायचा, याची कुठलीही माहिती देण्याची तसदी घेण्यात आलेली नाही. कमीतकमी प्रवेशप्रक्रियेसंबंधी प्रश्नांच्या निराकरणासाठी हेल्पलाईन क्रमांक तरी जारी करायला हवा होता, अशी मागणी विद्यार्थ्यांनी केली आहे.

असे आहे वेळापत्रक

ऑनलाईन अर्ज दाखल करणे- २७ ऑगस्ट ते ४ सप्टेंबर (सायं ५)

तात्पुरती गुणवत्ता यादी -६ सप्टेंबर

आक्षेप -६ ते ७ सप्टेंबर

अंतिम गुणवत्ता यादी -९ सप्टेंबर

पहिल्या फेरीसाठी पसंतीक्रम-९ ते ११ सप्टेंबर

जागांची वाटप यादी - १३ सप्टेंबर (दुपारी ३ वाजता)

महाविद्यालयात रिपोर्टिंग - १३ ते १६ सप्टेंबर

पहिल्या यादीतील रिक्त जागा- १७ सप्टेंबर

दुसऱ्या फेरीसाठी पसंतीक्रम- १७ ते १९ सप्टेंबर

जागांची वाटप यादी - २१ सप्टेंबर

महाविद्यालयात रिपोर्टिंग - २१ ते २४ सप्टेंबर

दुसऱ्या फेरीतील रिक्त जागा- २५ सप्टेंबर

समुपदेशन फेरी - २८ सप्टेंबर

शैक्षणिक वर्गांना सुरुवात - २४ सप्टेंबर