अपघातात दाेघांचा मृत्यू, एक जखमी

लाेकमत न्यूज नेटवर्क

पारशिवनी : वेगात जाणाऱ्या ट्रॅव्हल्सने माेटारसायकलला मागून जाेरात धडक दिली. त्यात दुचाकीवरील दाेघांचा घटनास्थळीच मृत्यू झाला तर एकजण गंभीर जखमी झाला. विशेष म्हणजे, तिघेही मित्र आहेत. ही घटना पारशिवनी शहरातील छत्रपती शिवाजी महाराज चाैकात बुधवारी (दि. ६) सायंकाळी घडली. या घटनेचे पडसाद गुरुवारी (दि. ७) सकाळी उमटले. अपघात टाळण्यासाठी विविध उपाययाेजना कराव्या या मागणीसाठी शहरात ‘रास्ता राेकाे’ आंदाेलन करण्यात आले.

यश भालेराव (१७), अनुप अतुल पनवेलकर (१४) अशी मृतांची तर लकी चव्हाण (१४) असे जखमीचे नाव आहे. तिघेही मित्र असून, पारशिवनी शहरातील रहिवासी आहेत. ते एमएच-४०/बीबी-४१३७ क्रमांकाच्या माेटारसायकलने खापरखेडा (ता. सावनेर) येथून पारशिवनीला येत हाेते. ते शहरातील छत्रपती शिवाजी महाराज चाैकात पाेहाेचताच मागून वेगात येणाऱ्या एमएपी-४८/पी-०२९१ क्रमांकाच्या ट्रॅव्हल्सने त्यांच्या माेटारसायकलला जाेरात धडक दिली. त्यात यश व अनुपचा घटनास्थळीच मृत्यू झाला तर लकी गंभीर जखमी झाला.

अपघात हाेताच नागरिकांसह पाेलिसांनी घटनास्थळाकडे धाव घेतली. दाेघांचे मृतदेह उत्तरीय तपासणीसाठी तर लकीला उपचारासाठी स्थानिक ग्रामीण रुग्णालयात नेले. तिथे लकीवर प्रथमाेपचार करून त्याला उपचारासाठी नागपूर येथील मेडिकल हाॅस्पिटलमध्ये दाखल करण्यात आले. याप्रकरणी पारशिवनी पाेलिसांनी ट्रॅव्हल्सचालक प्रकाश डहारे (४५, रा. मुलताई, जिल्हा बैतूल, मध्य प्रदेश) याच्या विराेधात गुन्हा नाेंदवून त्याला अटक केली.

या घटनेचे पडसाद गुरुवारी सकाळी उमटले. संतप्त नागरिकांनी घटनास्थळी ‘रास्ता राेकाे’ आंदाेलन केले. आंदाेलनाची तीव्रता लक्षात घेता रामटेक व देवलापार पाेलीस ठाण्यातून अतिरिक्त पाेलीस कुमक बाेलावण्यात आली हाेती. सकाळी ८ वाजतापासून सुरू झालेले आंदाेलन दुपारी २ वाजेपर्यंत सुरू हाेते. अधिकाऱ्यांनी तहसीलदार वरूणकुमार सहारे व ठाणेदार संताेष वैरागडे यांच्या उपस्थित उपाययाेजना करण्याचे फाेनवर आश्वासन दिल्याने आंदाेलन मागे घेण्यात आले. या आंदाेलनात नगराध्यक्ष प्रतिभा कुंभलकर, सलीम बाघाडे, भुजंग ढोरे, विजय भुते, रूपेश खंडारे, सचिन सोमकुवर, अनिता भड, सागर सायरे, वीरेंद्र गजभिये, दीपक शिवरकर, रोशन पिंपरामुळे, राहुल ढगे, किशोर वैद्य, चेतन देशमुख, सुरेंद्र चोरडिया, प्रमोद भड, अर्षद शेख, विजय बोथरा, रणजित ठाकूर, मोहन लोहकरे, पुखराज जैन, दीपचंद पालीवाल, दीपक भोयर, संजय कुंभलकर, सोनल वैद्य, शकील शेख, नीतू भुजाडे, परसराम राऊत, रितेश बावणे, आशिष भड, राधेश्याम नखाते यांच्यासह नागरिक सहभागी झाले हाेते.

...

या उपाययाेजना आवश्यक

पारशिवनी शहरातील अपघात टाळण्यासाठी छत्रपती शिवाजी महाराज चौकासोबतच साई लेआऊट चौक, बँक ऑफ इंडिया चौक, शासकीय रुग्णालय, तहसील कार्यालय चौक, महात्मा गांधी चौक या ठिकाणी तत्काळ गतिरोधक तयार करणे, दिवाणी व फौजदारी न्यायालय ते महात्मा गांधी महाविद्यालय या राेडवरील बंद असलेले पथदिवे सुरू करणे, वर्दळीच्या चौकात वाहतूक पोलील तैनात करणे, ठिकठिकाणी दिशादर्शक फलक लावणे या उपाययाेजना करण्याची मागणी नागरिकांनी रेटून धरली हाेती.

...

दाेघेही विद्यार्थी

यश हा माेटारसायकल चालवत हाेता. त्याने दहावी नापास झाल्यानंतर शिक्षण साेडले हाेते. अनुप व लकी मात्र बाभूळवाडा (ता. पारशिवनी) येथील लालबहादूर शास्त्री विद्यालयातील इयत्ता नववीचे विद्यार्थी आहेत. तिघेही मित्र असून, ते सामान्य घरातील आहेत. यशचे वडील वाहनचालक म्हणून काम करतात. नागरिकांचा राेष लक्षात घेता अपघाताला कारणीभूत ठरलेली ट्रॅव्हल्स खापा (ता. सावनेर) पाेलीस ठाण्याच्या आवारात जमा करण्यात आली.

...