नागपूर : पीपल्स रिपब्लिकन पार्टीचे अध्यक्ष जयदीप कवाडे यांनी भाजपा नेत्या स्मृती इराणी यांच्या चारित्र्यावर शिंतोडे उडविणारे आक्षेपार्ह वक्तव्य केले असून, त्यांच्या भाषणाची व्हिडिओ क्लिप व्हायरल झाल्याने संताप व्यक्त होत आहे. जयदीप कवाडे हे विधान परिषद सदस्य जोगेंद्र कवाडे यांचे सुपुत्र आहेत. नागपुरातील बगडगंज भागात काँग्रेस उमेदवार नाना पटोले यांच्या सोमवारच्या प्रचार सभेत त्यांनी हे संतापजनक वक्तव्य केले. याच सभेला काँग्रेस प्रदेशाध्यक्ष अशोक चव्हाण यांनीही संबोधित केले होते. मात्र, कवाडे यांनी हे आक्षेपार्ह वक्तव्य केले त्यापूर्वीच चव्हाण निघून गेले.
कवाडे म्हणाले, ‘स्मृती इराणी ही मस्तकावर खूप मोठे कुंकू लावते, आम्ही माहीत केल्यावर कळले की, जेवढे तिचे नवरे, तेवढेच मोठे मस्तकावरील कुंकू असते. स्मृती इराणी लोकसभेत गडकरींच्या मांडीला मांडी लावून बसते आणि संविधान संशोधन करण्याची भाषा करते, ‘आमच्या नाना पटोले यांनी स्मृती इराणीला थेट संसदेत ‘संविधान बदलणे हे नवरे बदलण्याएवढे सोपे काम नाही’, असा सवाल केला होता, असा वादग्रस्त दावाही कवाडे यांनी या वेळी केला. कवाडे बोलत असताना पटोले व्यासपीठावर उपस्थित होते. परंतु त्यांनी कवाडेंच्या दाव्यावर मौन साधले. उलट कवाडे यांचे भाषण संपल्यानंतर पटोले यांनी त्यांना बाजूला बसवून शाबासकी दिली.