वृत्तपत्र विक्रेत्यांनी लसीकरण करावे

लोकमत न्यूज नेटवर्क

नागपूर : महाराष्ट्रात ‘कोरोना’च्या प्रसारामुळे राज्य शासनाने अनेक नवे निर्बंध जाहीर केले आहेत. वृत्तपत्र व्यवसायातील संबंधित सर्वच एजंट्स आणि वृत्तपत्र विक्रेत्यांना वृत्तपत्र वाटप करण्याची मुभा देण्यात आली. ४५ वर्षांवरील सर्व एजंट्स व विक्रेत्यांनी ताबडतोब लसीकरण करून घ्यावे, असे आवाहन ‘व्हीडीएनए’चे अध्यक्ष श्रीकृष्ण चांडक यांनी केले आहे.

‘कोरोना’चा धोका वाढतो आहे. त्यामुळे वृत्तपत्र व्यवसायातील संबंधित सर्वच एजंट्स आणि वृत्तपत्र विक्रेत्यांनी काळजी घ्यावी व हयगय करू नये. सरकारी सूचनांची अंमलबजावणी करून ‘कोरोना’चा अधिक प्रसार अधिक होणार नाही यावर भर दिला पाहिजे. ४५ वर्षांखालील वृत्तपत्र विक्रेत्यांनी घराजवळील केंद्रावर ‘कोरोना’ची ‘आरटीपीसीआर’ चाचणी करून घ्यावी व ते प्रमाणपत्र स्वत:जवळ बाळगावे, असेदेखील श्रीकृष्ण चांडक यांनी सांगितले.