लोकमत न्यूज नेटवर्क
नागपूर : राष्ट्रीय स्वयंसेवक संघाच्या देशपातळीवरील समन्वय बैठकीचे नागपुरात आयोजन करण्यात आले आहे. ३ ते ४ सप्टेंबरदरम्यान रेशीमबाग स्मृतिमंदिर परिसरात हे आयोजन होणार आहे. या बैठकीला सरसंघचालक डॉ. मोहन भागवत, सरकार्यवाह दत्तात्रेय होसबळे यांच्यासह महत्त्वाचे सर्व पदाधिकारी उपस्थित राहतील.
संघाच्या कार्यप्रणालीत बैठकांना मोठे स्थान आहे. दरवर्षी विविध पातळ्यांवर बैठका होत असतात. वर्षभरातील कार्याचा आढावा घेण्यासाठी व काही वर्तमान विषयांवर मंथनासाठी समन्वय बैठकीचे नियमितपणे आयोजन होते. या बैठकीला संघ परिवारातील विविध संघटनांचे प्रतिनिधीदेखील उपस्थित असतात. या बैठकीत वर्षभरातील कामावर प्रकाशझोत टाकण्यात येतो. सोबतच समन्वयाच्या दृष्टीने काही नियोजनदेखील करण्यात येते. भाजपचे प्रतिनिधीदेखील या बैठकीत सहभागी होणार आहेत. भाजपकडून राष्ट्रीय सरचिटणीस बी. एल. संतोष हे उपस्थित राहण्याची शक्यता आहे. सोबतच विश्व हिंदू परिषद, विद्यार्थी परिषद, भारतीय मजदूर संघ, विद्याभारतीचे अखिल भारतीय संघटनमंत्री उपस्थित राहतील. दरम्यान गटश: बैठकांना मंगळवारपासूनच सुरुवात झाली असल्याची माहिती सुत्रांनी दिली. कोरोनामुळे संख्येला मर्यादा
कोरोनामुळे मार्च २०२०पासून नागपुरात मोठ्या बैठकीचे आयोजन झालेले नाही. नागपुरात नियोजित असलेली अखिल भारतीय प्रतिनिधी सभादेखील बंगळुरू येथे घेण्यात आली. दरम्यान, दीड वर्षात सरसंघचालकांसह संघाचे विविध पदाधिकारी सातत्याने विविध क्षेत्रांमध्ये जाऊन बैठका घेत होते. एकाच ठिकाणी गर्दी टाळण्यासाठी हे पाऊल उचलण्यात आले होते. दरवर्षी सप्टेंबर महिन्यात मोठी बैठक होते. मागील वर्षी कोरोनामुळे छोटेखानी बैठक झाली होती. यंदादेखील उपस्थितांची संख्या मर्यादित राहणार असल्याची माहिती अखिल भारतीय प्रचार प्रमुख सुनील आंबेकर यांनी दिली. कोरोना नियंत्रणात आल्यावर २०२२च्या सुरुवातीला मोठी बैठक आयोजित करण्यात येणार आहे.