- तर नरखेडमध्ये राष्ट्रवादीचे आधीचेच उमेदवार मैदानात

नरखेड : स्थानिक स्वराज्य संस्थांमधील आरक्षण मर्यादा ५० टक्क्यांवर गेल्याने सर्वोच्च न्यायालयाच्या निकालानंतर नागपूर जिल्ह्यातील ओबीसी प्रवर्गातून विजयी झालेल्या १६, तर पं.सं.च्या ३१ सदस्यांचे सदस्यत्व रद्द झाले आहे. त्याचा फटका नरखेड तालुक्यातील दोन जि.प. सदस्य व दोन पं.स. सदस्यांना बसला आहे. मात्र नव्याने काढण्यात आलेल्या आरक्षण सोडतीत या उमेदवारांना सर्वसाधारण गटातून निवडणूक लढण्याची पुन्हा संधी प्राप्त झाली आहे. त्यामुळे पुन्हा निवडणूक झाल्यास राष्ट्रवादीकडून आधीच्याच उमेदवारांना संधी मिळण्याची शक्यता आहे.

जि.प.च्या सावरगाव सर्कलमधून देवका पुरुषोत्तम बोडखे या ओबीसी (महिला) तर भिष्णूर सर्कलमधून पूनम जोध या ओबीसी (महिला) विजयी झाल्या होत्या. येथे सावरगाव पं.स. गणात वैभव वासुदेव दळवी हे ओबीसी सर्वसाधारण तर बेलोना पं.स. गणात रश्मी आरघोडे या ओबीसी (महिला) प्रवर्गातून विजयी झाल्या होत्या. त्यांच्यावर १४ महिन्यातच अपात्र होण्याची वेळी आली. हे सर्व सदस्य राष्ट्रवादी काँग्रेसचे होते. २३ मार्च रोजी काढण्यात आलेल्या नवीन आरक्षण सोडतीत सावरगाव जि.प. सर्कल साधारण (महिला) भिष्णूर (सर्वसाधारण), सावरगाव पं.स. गण (सर्वसाधारण) तर बेलोना पं.सं. गण सर्वसाधारण (महिला) यांच्याकरिता आरक्षित झाला आहे. त्यामुळे येथे पुन्हा निवडणूक झाल्यास या चारही उमेदवारांना नव्या आरक्षण सोडतीनुसार निवडणूक लढता येईल.