कास्ट व्हॅलिडिटी ऑनलाईन वितरणात राज्यात नागपूर आघाडीवर

आनंद डेकाटे

लोकमत न्यूज नेटवर्क

नागपूर : नागरिकांना जात पडताळणी प्रमाणपत्र लवकर मिळावे व कामात सुलभता यावी, या उद्देशाने शासनाने ‌‘कास्ट व्हॅलिडिटी ऑनलाईन वितरण’ची व्यवस्था करण्यात आलेली आहे. त्यात नागपूर जिल्हा राज्यात आघाडीवर आहे. तब्बल चार हजार अर्जापैकी तीन हजारावरील अर्ज मार्गी लावण्याची कामगिरी नागपूरने केली आहे.

जात पडताळणीच्या कामाबाबत नेहमीच ओरड असते. यातच एकेका प्रमाणपत्रासाठी होत असलेल्या विलंबामुळे नागरिक अधिकच त्रस्त होतात. यामुळे राज्य शासनाने एकूणच कामांमध्ये ऑनलाईनचा वाढवलेला वापर यातही करण्यात आला आहे. सध्या कास्ट व्हॅलिडिटी ऑनलाईन वितरणाचे काम जोमात सुरू आहे. राज्यभरातील जात पडताळणी समितीच्या कामात यामुळे गती आली असली तरी राज्यातील इतर समितीच्या मानाने नागपुरातील काम जोमात असल्याचे दिसून येते. आतापर्यंत नागपूर जिल्ह्यात एकूण ४३८५ जणांनी जात पडताळणीसाठी ऑनलाईन अर्ज केला. यापैकी ३०३३ जणांचे अर्ज निकाले निघाले असून प्रमाणपत्र त्यांना वितरितही झाले आहे. तर १३७० अर्जावर समितीचे काम सुरु आहे.

राज्यातील इतर कुठलाही जिल्हा नागपूरच्या आसपासही नाही. अहमदनगर व अमरावती जिल्ह्याचाच विचार केल्यास तिथे ५ हजारावर अर्ज सादर झाले असून अहमदनगरमध्ये १९७७ व अमरावतीत १४३१ अर्ज निकाली निघालेले आहे. नाशिक जिल्ह्यातील ४२८८ अर्जापैकी केवळ ४२३ अर्ज निघाली निघाले आहेत. एकूणच राज्यातील इतर जिल्ह्याच्या तुलनेत नागपूर जिल्ह्यातील जात पडताळणीच्या कामाला चाांगलीच गती मिळाल्याचे दिसून येते.

सर्व कागदपत्रे व्यवस्थित स्कॅन होणे आवश्यक

जात पडताळणीसाठी भरलेला ऑनलाईन अर्ज रिजेक्ट होऊ नये, यासाठी अर्जदाराने ऑनलाईन अर्ज भरताना काळजी घेणे आवश्यक आहे. यासाठी सर्व मूळ कागदपत्रांचे परिपूर्ण स्कॅनिंग करावे. शपथपत्र भरताना त्याची तिन्ही पाने स्कॅन करावी. एकूणच सर्व कागदपत्रे व्यवस्थित अपलोड केल्यास अर्जदाराला त्याचे प्रमाणपत्र लवकरच उपलब्ध होते.

- सुरेंद्र पवार, अध्यक्ष, जात पडताळणी समिती, नागपूर

राज्यातील जिल्हानिहाय स्थिती

जिल्हा अर्ज सादर अर्ज निकाली

नागपूर ४,३८५ ३,०३३

अहमदनगर ५,१०१ १,९७७

पुणे २,०८४ १,७८५

अमरावती ५,४८ १,४३१

ठाणे १,७७२ १,२४६

औरंगाबाद १,८७१ १,०५०

नाशिक ४,२८८ ४२३

मुंबई उपनगर ६५२ ६२