नागपूर फ्लाइंग क्लबला प्रशिक्षणाची परवानगी नाही

वसीम कुरैशी

नागपूर : चार वर्षे तीन महिन्यांनंतरही नागपूर फ्लाइंग क्लबची प्रशिक्षण उड्डाणे सुरू झालेली नाहीत. प्रशासकीय प्रक्रियेची गती संथ असल्यामुळे आतापर्यंत प्रशिक्षण विमाने संचालन करण्याची परवानगी (एफटीओ परवाना) मिळालेली नाही. क्लब १७ जून २०१७ पासून बंद आहे, हे विशेष.

विमानाचे इंजिन बदलविण्याची प्रक्रिया १६ जून २०१७ पासूनच सुरू झाली. चार वर्षांनंतर अजूनही एक विमानाची दुरुस्ती झालेली नाही. जवळपास एका वर्षापूर्वी तीन तयार विमानांचे एअरवर्दिनेस सर्टिफिकेट (एआरसी) क्बलला मिळाले आहे. परवाना मिळण्यासाठी क्लबमध्ये उडण्यासाठी तयार विमाने आणि कर्मचारी आवश्यक असतात. विमानांना तयार करण्यासह कर्मचाऱ्यांची भरतीही सुरू करण्यात आली आहे.

एक महिन्यापूर्वी डेप्टी चीफ फ्लाइंग इन्स्ट्रक्टरसह अन्य पदांवर नियुक्तीनंतर फ्लाइट ट्रेनिंग ऑर्गनायझेशनकरिता (एफटीओ परवाना) नागरी उड्डयन संचालनालयाकडे (डीजीसीए) प्रस्ताव दिला आहे.

देशात वैमानिकांची कमतरता

देशातील काही सरकारी फ्लाइंग क्लबमध्ये नागपूरचा एक क्लब आहे. अन्यच्या तुलनेत येथे प्रशिक्षण उड्डाणांसाठी चांगले वातावरण आहे. आंतरराष्ट्रीय विमानतळ, जागतिकस्तरीय एमआरओसह फ्लाइंग प्रशिक्षण येथील एव्हिएशनला पूर्णत: प्रदान करते. राजकीय स्तरावर प्रयत्न झाल्यास हा क्लब लवकरच सुरू होऊ शकतो. संपूर्ण जगात वैमानिकांची कमतरता आहे. नागपूर फ्लाइंग क्लबला ही कमतरता जाणवत आहे. या क्लबद्वारे अनेक युवकांना करिअर बनविता येऊ शकते. क्लब सुरू न झाल्याने चार वर्षांपूर्वी येथे प्रवेश घेणारे काही प्रशिक्षणार्थी या क्षेत्रात करिअर बनवू शकले नाहीत.

परवान्यासाठी तयारी पूर्ण

एफटीओ परवान्यासाठी आम्ही पूर्ण तयारी केली आहे. मान्यतेसाठी डीजीसीएकडे प्रस्ताव पाठविला आहे. डीजीसीए टीमच्या दौऱ्यानंतरच परवानगीची प्रक्रिया पुढे वाढणार आहे. क्लबच्या चार विमानांपैकी तीन तयार असून, एकामध्ये थोडीफार दुरुस्ती करण्यात येणार आहे.

-मिलिंद साळवे, प्रभारी व्यवस्थापकीय संचालक, नागपूर फ्लाइंग क्लब