गुलजार यांच्या गीतांनी बहरली संगीत संध्या

गीतकार व कवी गुलजार यांना अलीकडेच चित्रमहर्षी दादासाहेब फाळके पुरस्काराने सम्मानित करण्यात आले. यानिमित्त समस्त रसिक श्रोत्यांतर्फे त्यांना मानाचा मुजरा करण्यासाठी

मैत्री परिवारातर्फे आयोजन : रसिकांनी लुटला आनंद

नागपूर : गीतकार व कवी गुलजार यांना अलीकडेच चित्रमहर्षी दादासाहेब फाळके पुरस्काराने सम्मानित करण्यात आले. यानिमित्त समस्त रसिक श्रोत्यांतर्फे त्यांना मानाचा मुजरा करण्यासाठी प्रख्यात शेफ विष्णू मनोहर व मैत्री परिवार संस्थेतर्फे सोमवारी गुलजार यांच्या गीतांचा ‘इस मोड से...’ या संगीत संध्या कार्यक्रमाचे आयोजन करण्यात आले होते. बजाजनगर येथील ‘विष्णूूजी की रसोई’ येथे हा कार्यक्रम पार पडला. यात सचिन ढोमणे यांचे संगीत संयोजनासह सुरभी ढोमणे, मंजिरी वैद्य, सागर मधुमटके, सारंग जोशी व विष्णू मनोहर यांनी भाग घेतला होता. गुलजार यांच्या सिनेगीतांच्या बंदिनी, घर, आशीर्वाद, खामोशी, आंधी, आनंद व स्लम डॉग मिलेनियर अशा अमीट प्रसंगाच्या स्क्रीनवरील (व्हिडिओ) अनुभूतीमुळे हे सादरीकरण विशेष आनंददायी ठरले होते. गुलजार यांचे प्रत्येकच गीत म्हणजे साधे व भावपूर्ण शब्द, संगीतकारांचे सुरेल स्वर व लता, गीता दत्त, आशा, किशोरकुमार, एस. डी. बर्मन, राहुल देव बर्मन व भूपेंद्र सिंग यांच्या प्रतिभेचा उत्सवच असतो. यात सहभागी गायकांनीही तेवढ्याच मधूर, भावपूर्ण व समरसतेने २४ गीतांचा नजराणा सादर केला. सागर मधुमटके याच्या बेजोड स्वरातील ‘फिर वही रात है...’ या गीताने कार्यक्रमाची सुरुवात झाली. यानंतर मंजिरीने ‘मोरा गोरा अंग लेले..., बोले रे पपिहरा..., ना जिया लागे ना..., तुम्हे हो ना हो..., पिया बावरी...,अशी’ गीते सादर केली. तसेच सुरभीने ‘मेरी जाँ..., हमने देखी है इन आँखो की..., आज कल पाँव जमींपर नही पडते मेरे..., तुमसे नाराज नही जिंदगी..., ’ या गीतांसह सारंगने ‘तुम पुकार लो..., ए जिंदगी गले लगा ले...,’ सागरने ‘मुसाफिर हूँ यारो..., ओ मांझी रे अपना...’ अशी गीते सादर करून, विष्णू मनोहर यांनी ‘धन्नो की आँखो मे...’ हे भन्नाट गीत गायले. सागर व सुरभीचे ‘इस मोड से जाते है...’ आणि सारंग व सुरभीचे ‘बिती ना बिताये रैना...’ अशा युगल गीतांसह हे सादरीकरण अधिकच बहरले. या कार्यक्रमाला डॉ. मनोज साल्फेकर यांच्या अभ्यासपूर्ण निवेदनासह सचिन ढोमणे, नंदू गोहणे, विक्रम जोशी, उज्ज्वला गोकर्ण, महेंद्र ढोले, विक्रम लिमये, प्रसन्ना वानखेडे, रिंकू निखारे, अमर शेंडे यांची सुरेल सहसंगत लाभली होती. व्यासपीठ सजावट विवेक रानडे व प्रफुल्ल मनोहर यांनी केली होती. (प्रतिनिधी)