अंबाझरीच्या बळकटीसाठी मनपा तिजोरी खोलेना ()

नागपूर : अंबाझरी तलावाचे चार टप्प्यात बळकटीकरण करण्याचा १९.३९ कोटींचा प्रस्ताव जलसंपदा विभागाने तयार केला आहे. मात्र, पहिल्या टप्प्यातील काम सुरू करण्यासाठी ३.१४ कोटींची गरज आहे. हा निधी देण्याची महापालिकेने तयारी दर्शविली आहे. मात्र, अद्याप जलसंपदा विभागाकडे निधी वळता केलेला नाही. महापालिकेच्या समोर असलेल्या आर्थिक संकटामुळे अंबाझरी तलाव बळकटीकरणाचा प्रकल्पच संकटात सापडू नये, अशी अपेक्षा व्यक्त केली जात आहे.

या प्रकल्पासाठी लागणाराचा खर्च महापालिका, महामेट्रो व राज्य सरकार उचलणार आहे. महामेट्रोने सुरुवातीला एक कोटी रुपये जलसंपदा विभागाकडे वळते केले आहेत. वेळेवेळी झालेल्या बैठकीत महापालिकेने निधी देण्याची तयारी दर्शविली. मात्र, प्रत्यक्षात निधी दिला नाही तर राज्य सरकारनेही अद्याप निधीसाठी पुढाकार घेतलेला नाही. आता प्रत्यक्ष कामाला सुरुवात करण्यास खूप विलंब झाला तर प्रस्तावित खर्चात वाढ होण्याचा धोका आहे. तसे झाले तर महापालिकेवर बोजा वाढेल व तो महापालिकेला परवडणारा नसेल.

१३० मीटर रिटेनिंग वॉल बांधणार

- अंबाझरी धरणाच्या स्लीप चॅनेलच्या उजव्या तिरावर दगडमिश्रीत मातीची भिंत आहे. त्यापुढे भिंतीच्या माथ्यावरील बाजूस लागूनच म्हणजे हिंगणा रोडवरील मेट्रोचे बांधकाम असल्यामुळे या भिंतीची झिज होऊ नये म्हणून १३० मीटर लांबीची रिटेनिंग वॉल बांधली जाईल.

कट ऑफ वॉलचेही बांधकाम होणार

- धरणाच्या सांडव्याच्या उजव्या बाजूस पाणी झिरपत असल्याचे पाहणीत आढळून आले होते. त्यामुळे याच्या वरील बाजूस काळी माती भरून कट ऑफ वॉलचे बांधकाम केले जाणार आहे.