कमलेश वानखेडे,नागपूर : मुंबई कृषी उत्पन्न बाजार समिती नवी मुंबई येथील विकास टप्पा दोन मार्केट एक या मार्केटमधील चटई क्षेत्र (एफएसआय) वाटप प्रकरणी आठ दिवसात उच्च न्यायालयात शपथपत्र दाखल केले जाईल, अशी माहिती कृषी मंत्री अब्दुल सत्तार यांनी बुघवारी विधानसभेत दिली.
आ. महेश शिंदे यांनी यासंदर्भात लक्षवेधी सूचना मांडत एफएसआय वाटपात बाजार समितीचे अधिकारी व संचालक मंडळदोषी असल्याचे सांगितले. यावर उत्तर देताना सत्तार म्हणाले, मुंबई कृषी उत्पन्न बाजार समितीमध्ये ४६६ गाळेधारकांना एफएसआयचे वाटप केले आहे. अशा या गाळेधारकांकडून फरकाची रक्कम वसूल करण्याची सर्वांना नोटीस पाठविण्यात आलेली आहे.
या प्रकरणी न्यायालयात आठ दिवसाच्या आत विभागाकडून शपथपत्र दाखल केले जाईल आणि न्यायालयाच्या निर्णयानुसार पुढील कारवाई करण्यात येईल. तसेच संपूर्ण चौकशी करण्यात येईल. याप्रकरणी सीनियर कौन्सिल नेमून सर्व माहिती न्यायालयाला दिली जाईल. याप्रकरणी अधिकाऱ्यांचीही चौकशी केली जाईल, असेही सत्तार यावेळी स्पष्ट केले.