शिवजयंतीला प्रभातफेरी, मिरवणुकांना बंदी

नागपूर : यंदा १९ फेब्रुवारी रोजी छत्रपती शिवाजी महाराज यांची जयंती कोरोनाच्या पार्श्वभूमीवर आल्याने ती कशी साजरी करायची, याबाबत शासनाने मार्गदर्शक सूचना जारी केल्या आहेत. शिवजयंतीच्या निमित्ताने कुठल्याही प्रभातफेरी, बाईक रॅली, मिरवणुकींना यंदा परवानगी नसून, शिवजयंतीच्या पर्वावर आरोग्यविषयक शिबिर, उपक्रम नियमांचे पालन करीत राबविण्याला मात्र शासनाने परवानगी दिली आहे. याच आधारावर महापालिकेने मार्गदर्शक सूचना जारी केल्या आहेत.

शिवजयंतीसंदर्भात शासनाने ११ फेब्रुवारी रोजी मार्गदर्शक सूचना जारी केल्या आहेत. दरवर्षी शिवजयंतीनिमित्ताने महाराष्ट्रात विविध कार्यक्रमांचे आयोजन करण्यात येते. यावर्षी शिवजयंतीच्या दिवशी आरोग्यविषयक उपक्रम/शिबिरे आयोजित करण्याला प्राधान्य देण्यात यावे, असे परिपत्रकात म्हटले आहे. या माध्यमातून कोरोना, मलेरिया, डेंग्यू इत्यादी आजार आणि त्यांचे प्रतिबंधात्मक उपाय तसेच स्वच्छता याबाबत जनजागृती करण्यात यावी. आरोग्यविषयक उपक्रमांचे आयोजन करताना त्या ठिकाणी सोशल डिस्टंसिंग तसेच स्वच्छतेचे नियम (मास्क, सॅनिटायझर इत्यादी) पाळण्याकडे विशेष लक्ष देण्यात यावे, असेही परिपत्रकात म्हटले आहे.

अशा आहेत सूचना

- कोणत्याही प्रकारे सार्वजनिक ठिकाणी पोवाडे, व्याख्याने, गाणे, नाटक इत्यादींचे सादरीकरण अथवा इतर सांस्कृतिक कार्यक्रमांचे आयोजन करण्यात येऊ नये.

- सदर कार्यक्रमाचे केबल नेटवर्क अथवा ऑनलाइन प्रक्षेपण उपलब्ध करून देण्याबाबत व्यवस्था करावी.

- कोणत्याही प्रकारे प्रभात फेरी, बाईक रॅली, मिरवणुका काढण्यात येऊ नये.

- त्याऐवजी छत्रपती शिवाजी महाराजांच्या पुतळ्याला अथवा प्रतिमेला पुष्पहार अर्पण करण्याचा कार्यक्रम आयोजित करण्यात यावा.

- यासाठी सोशल डिस्टंसिंगचे पालन करत १० व्यक्तींच्या उपस्थितीला परवानगी राहील.