‘मेयो’चे निवासी डॉक्टर आजपासून संपावर

नागपूर : कोरोनाची दुसरी लाट थैमान घालत असताना, इंदिरा गांधी शासकीय वैद्यकीय महाविद्यालय व रुग्णालयातील (मेयो) निवासी डॉक्टरांच्या ‘मार्ड’ संघटनेने शैक्षणिक नुकसान टाळण्याच्या मुख्य मागणीसाठी बुधवारपासून सामूहिक रजा आंदोलनाचे हत्यार उपसले. तसे निवेदन त्यांनी अधिष्ठाता डॉ. अजय केवलिया यांना दिले. संपाच्या काळात अतिगंभीर रुग्ण अडचणीत येऊ नये म्हणून केवळ अतिदक्षता (आयसीयू) विभागात निवासी डॉक्टर सेवा देणार आहेत.

मेयो ‘मार्ड’चे सल्लागार सदस्य डॉ. गणेश पारवे यांनी सांगितले की, कोरोनाचे सामान्य रुग्ण सांभाळण्याची जबाबदारी आरोग्य विभागाची आहे. यासाठी मागील वर्षी जवळपास ७५ वैद्यकीय अधिकारी (एमओ) मेयोला दिले होते. जेव्हा रुग्णसंख्या कमी होऊ लागली तेव्हा त्यांनी ‘एमओ’ काढून घेतले. मेयो, मेडिकल हे ‘टर्शरी केअर सेंटर’ आहे. यामुळे कोरोनाचे केवळ गंभीर रुग्ण पाहण्याची जबाबदारी आमची आहे. मागील आणि आता हे सुद्धा वर्ष कोरोना रुग्णसेवेत जात आहे. २४ तास ड्युटी लावली जात आहे. यामुळे शैक्षणिक नुकसान होत आहे. ‘स्पेशालिस्ट’ डॉक्टर होण्यासाठी लागणारे शिक्षण, कौशल्य व अनुभव कधी मिळणार, हा प्रश्न आहे. मागील वर्षी शिक्षण झालेच नाही, तरीही शिक्षणाची फी भरण्यास लावली जात आहे. ती माफ व्हायला हवी. २४ तास बाधितांच्या सेवेत राहूनही निकृष्ट दर्जाचे पीपीई किट पुरविले जातात. हे थांबायला हवे. कोरोना रुग्णांमुळे मेयोमध्ये शोधप्रबंध (थेसीस) करण्यास इतर रुग्ण मिळत नाही. यामुळे ‘थेसीस’मधून सूट देण्यात यावी, अशी मागणीही निवेदनातून करण्यात आल्याचे डॉ. पारवे म्हणाले.

शिष्टमंडळात मेयो ‘मार्ड’चे अध्यक्ष डॉ. रजत अग्रवाल, सरचिटणीस डॉ. आशिष केंद्रे, डॉ. आसिफ पटेल, डॉ. गणेश पारवे, डॉ. अद्वैत मुळे उपस्थित होते.

- रुग्णसेवा प्रभावित होण्याची शक्यता

निवासी डॉक्टर हे शासकीय रुग्णालयातील ‘कणा’ समजले जातात. सद्यस्थितीत कोरोना रुग्णांना सेवा देण्यास हेच समोर आहेत. वरिष्ठ डॉक्टर कोविड वॉर्डात जातही नाहीत. यामुळे बुधवारपासून रुग्णसेवा प्रभावित होण्याची शक्यता आहे.

- आंदोलन मागे घेण्यासाठी बोलणी सुरू

निवासी डॉक्टरांच्या सामूहिक रजेचे आंदोलन मागे घेण्यासाठी त्यांच्याशी बोलणी सुरू आहे. कोरोना रुग्णांची वाढती संख्या व मृत्यू पाहता ते आंदोलन मागे घेतील, ही अपेक्षा आहे.

- डॉ. अजय केवलिया

अधिष्ठाता, मेयो